«АС-ҮӨЛ» быыстапка-дьаарбаҥкаттан түгэннэр

Куорат олохтоохторугар, ыалдьыттарыгар уонна Саха сирин олохтоох аһы-үөлү бэлэмнээччилэригэр бэйэлэригэр да олус күүтүүлээх, кэтэһиилээх тэрээһин – өрөспүүбүлүкэ таһымнаах “Ас-үөл–2025” быыстапка-дьаарбаҥка быйыл сэрэдэ күнтэн саҕалаан, бүтүн биэс күн устата буолан ааста.

Иннинээҕи сылларга тэҥнээтэххэ, кыттааччы аҕыйаабыт курдук да, балай эмэ элбэх ас көрүҥэ атыыланна. Ыраахтартан Ньурба улууһун “Байар” кэпэрэтиибин аһа-үөлэ, “Саха сүөһүтэ” хааһына тэрилтэтин Маалыкайдааҕы салаатыттан Мэгэдьэк сылгытын этэ, иһэ, быара, хаана, Томпо арыыта көстөрө. Кэбээйиттэн бааллара.

ТХМ чахчытынан, бу сырыыга өрөспүүбүлүкэ 15 агро хайысхалаах оскуолата кытынна. Ону сэргэ Дьокуускай куораттан быйыл төрүттэммитэ лоп курдук 20 сыла туолар, өрөспүүбүлүкэҕэ киэҥник биллэр, бастыҥ үлэлээх “Айыы кыһата” оскуола кыттыбытын кэрэхсии, хайгыы көрдүм. Маладьыастар, агро хайысхата суохпут диэн туттунан олорботохтор. Үбүлүөйдээх сылларыгар сыһыаран, быйыл кучу оттон 20 араас көрүҥ чэйи бэлэмнээбиттэр. Быыстапка-дьаарбаҥкаҕа алта көрүҥүн билиһиннэриигэ аҕалбыттар этэ. Бу оскуола “Саха чэйэ” хампаанньаны кытта бииргэ үлэлэспитэ быданнаата. Сайыҥҥы сынньалаҥы бэрт туһалаахтык атаарыы, араас хабааннаах, ол иһигэр олохтоох оҥорон таһаарыыга, төрүт дьарыкка сыһыаннаах оҕо лааҕырын тэрийэн үлэлэтии бу кыһаҕа – олоҕурбут уонна тулхадыйбат үгэс.

Дьаарбаҥка түмүгүнэн сир аһын, отонун бэлэмигэр 1-кы ист. дьупулуому Н.И. Петров бэрэссэдээтэллээх “Чурапчы” ТХПК отон сироба ылла. Сунтаар “Тирэҕэ” барыанньаҕа бастаата, сироптара 2-с, 3-с миэстэлэннэ.

Мүөттээх ыҥырыа бородууксуйатын бэлэмигэр  Чурапчы Мырылатын урбаанньыта К.Тимофеева бастыҥынан ааттанна. Балык астарга Дьокуускайдааҕы  “Ас-рыба” ХЭУо чорбойдо. 2-с, 3-с  миэстэлэри эмиэ Дьокуускайтан “Якутские деликатесы” ыыһаммыт уомула уонна барбах туустаммыт тууччаҕа ылла.  Тулагы агро-оскуолатын СПК-та собоҕо арыы эбэн оҥорбут кэнсиэрбэтэ “Сонун саҥа бородуукта” номинациянан бэлиэтэннэ. Бастыҥ килиэби бэлэмнээччинэн уонна агро-бырамыысыланнай тэрилтэлэр ортолоругар быыстапка кылаан кыайыылааҕынан (Гран-при) быйыл 85 сылын бэлиэтиир “Дьокуускайдааҕы килиэп собуота” ааттанна.

Оттон орто кээмэйдээх тэрилтэлэргэ бастыҥ “Чурапчы” ТХПК буолла.

“Бастыҥ ыраас уу” аатын Дьокуускай урбаанньыта  В. Игнатьев бэлэмниир “Дархан” уута ылла. Бастыҥ сыыр “Дьокуускайдааҕы үүт собуотун” “Домашняй” диэнэ буолла. Оҕолорго анаммыт битэмииннээх үүттэрэ эмиэ кыайыы кынаттанна. Ити курдук, ас араас көрүҥнэринэн көрөн, тус-туһунан кыайыылаахтары быһаардылар. Оттон атыылаһааччылар “Күһүҥҥү киһи күлбүтүнэн” өс хоһоонун илэ билэн, ботуччу атыылаһан, кэнсиэр көрөн, астынан тарҕастылар.

Аһы-үөлү таһынан манна үүнээйи үнүгэстэрэ, дьиэтээҕи сибэкки арааһа,  уоҕурдуу эмиэ атыыланна.

Ааптар хаартыскаларыгар быыстапка түгэннэрин көрөҕүт.