Арыгыны көҥүлэ суох атыылыылларын биллэххэ, ханна үҥсэбит?

Итирдэр утахтары сокуоннайа суох атыылааччы РФ ХК 171.4 ыст. холуобунай эбэтэр  РФ КоАП 14.17.1 ыст. административнай эппиэтинэскэ тардыллар. Буруйу хатылааһын иһин эппиэтинэс өссө кытаатар.

Бу күннэргэ Саха сирин үрдүнэн полиция үлэһиттэрэ ыыппыт «Бутлегер» («бутлегерство» – итирдэр утаҕы сокуоннайа суох оҥорон таһаарыы эбэтэр атыылааһын – аапт.) оперативнай-сэрэтэр эпэрээссийэлэрин түмүгэр итирдэр утаҕынан көҥүлэ суох эргинэр үгүс «туочука» тутуллубутун суруйдулар. Арыгыны сокуоннайа суох атыылааһыҥҥа киирсэр: лиссиэнсийэтэ суох атыылааһын (биирдиилээн да, кууһунан да), олохтоммут бириэмэттэн атын кэмҥэ атыылааһын, бобуллар сирдэргэ, холобур, үөрэх тэрилтэтин аттыгар атыыны тэрийии уо.д.а. быраабылалары кэһии. Кэнники кэмҥэ итирдэр утаҕы массыына иһиттэн атыылааһын үксээн иһэрин суруйаллар. Манан дьарыгырааччылар төлөпүөннэрин нүөмэрин социальнай ситим көмөтүнэн күүскэ тарҕатартан да толлубаттара, кинилэр өҥөлөрүгэр наадыйааччы да элбэҕэ соһуппат буолбута ыраатта.

Өскөтүн бу маннык олохтоммут быраабылалары кэһэн туран итирдэр утаҕы атыылыылларын биллэххэ, дьэ, ханна үҥсүөххэ сөбүй?

• Бастатан туран, полицияҕа (ИДьМ) иһитиннэриини тириэрдиэххэ сөп. Арыгыны лиссиэнсийэтэ суох, бобуллубут кэмҥэ, сокуоннай сааһын туола иликтэргэ атыылааһын курдук түбэлтэлэринэн суһал бэрэбиэркэни ыытыа.

• Хаачыстыбата суох, туох табаар буолара биллибэт итирдэр утаҕы атыылыылларын биллэххэ, Роспотребнадзорга тахсыллар.

• Полицияҕа иһитиннэрбит кэннэ дьаһал ылыллыбат түгэнигэр, прокуратураҕа үҥсүллэр.

• Маны тэҥэ олохтоох дьаһалтаҕа эмиэ үҥсүү түһэриэххэ сөп.

Дьокуускай куораты ылар эбит буоллахха, бу күһүн куорат баһылыга Евгений Григорьев телеграм-ханаалыгар «арыгыны сокуоннайа суох атыылааһын түбэлтэтин ВКонтакте социальнай ситимҥэ баар тус страницабар суруйан биллэриҥ» диэн ыҥырыы таһаарбыта. Онно суруйаргытыгар арыгы сокуоннайа суох атыыланар миэстэтин, аадырыһын, маҕаһыын, сымыйа кафе аатын, эбэтэр бутлегер массыынатын нүөмэрин ыйар наадатын бэлиэтээбитэ. Ону хаартыска, видео көмөтүнэн бигэргэтэр ордугун, чопчу чахчылардаах иһитиннэрии полицияҕа тутатына тириэрдиллэрин мэктиэлээбитэ. Онон, быраабы араҥаччылыыр уорганнарга үҥсүү-харсыы түһэрэртэн толлор, ол эрээри арыгы сокуоннайа суох көҥүл атыыланарыттан мунчаарар дьон куорат баһылыгар ВКонтакте суруйуоххутун сөп.