Арыгыны иһиини аҕыйатыы нэдиэлэтэ буола турар

Доруобуйа харыстабылын министиэристибэтин чахчытынан, өрөспүүбүлүкэҕэ арыгыны иһии иэнэ аҕыйаабыт. Маныаха арыгыны атыылыыр бириэмэҕэ, услуобуйаҕа хааччахтар, «чөл нэһилиэктэр» элбээбиттэрэ, араас өрүттээх профилактическай үлэ, маны сэргэ спорт, арыгыта суох эйгэлэри тэрийии, о.д.а. үтүө сабыдыал буолбуттарын ыйаллар.

Дьокуускайдааҕы наркология диспансерын (ЯРНД) исписэлиистэрэ мобильнай быраастар биригээдэлэрин кытта улуустарынан сылдьан нэһилиэнньэҕэ консультациялары, бэсиэдэлэри ыыталлар.

Оттон арыгылааһынтан эмсэҕэлээбит дьон ЯРНД суһал линиятыгар эрийэн консультация ылыахтарын сөп: 8 924 591-10-20.

Маны сэргэ итэҕэл төлөпүөнэ үлэлиир: 8 924 567-89-90. Бу нүөмэринэн ыксаллаах быһыыга-майгыга эбэтэр суһал психологическай көмө наада түгэнигэр эрийиэххитин сөп, диэн Ил Дархан уонна Бырабыыталыстыба пресс-сулуспата иһитиннэрэр.