Арыгылаах утаҕынан эргинээччилэргэ «сыһыан» өссө кытаатар

Маны сэргэ 1 тыһыынча лиитэрэ кэриҥэ иэннээх арыгылаах утах эргиэнтэн таһаарыллыбыт.

Куорат Административнай хамыыһыйатын бэрэссэдээтэлин эбээһинэһин толорооччу Егор Семенов «наливайкалары» бэрэбиэркэ түмүгүн иһитиннэрдэ. Ол курдук, Оржоникидзе уул., 39/1 үлэлии турбут «ПивоRoob» маҕаһыын дуогабара көтүрүллүбүтүнэн сабыллыбыт, маны сэргэ дискаунтер салалтата лицензиятын уһатартан аккаастаммыт. Кэлиҥҥи икки сылга бу филиал 15 төгүл (!) административнай эппиэтинэскэ тардыллыбыт уонна 1 мөл. солк. тахса суумаҕа ыстарааптаммыт.

Куорат баһылыга Евгений Григорьев бэлиэтээбитинэн, 20 «наливайкаттан» турар испииһэк уонна нэһилиэнньэттэн киирбит үҥсүүлэр Роспотребнадзорга, ЫБММ, урбаан министиэристибэтигэр уонна нолуок сулууспатыгар ыытыллыахтара. Маны сэргэ куорат прокуратурата «наливайкалар» «ордууланар» дьиэлэригэр -- быраап, ЫБММ баһаартан сэрэхтээх буолуу быраабылаларын тутуһуу өттүнэн сыанабыл биэриэхтэрэ.

Дьокуускай куорат территориятыгар арыгылаах утаҕынан эргинэр юридическай сирэйдэри административнай эппиэтинэскэ тардыы туһунан баһылык Евгений Григорьев салайааччылаах, куорат прокуратуратын, полициятын, Роспотребнадзор, ЫБММ, урбаан министиэристибэтин, Олохтоох дьаһалта структураларын бэрэстэбиитэллэрэ кыттыылаах мунньахха кэпсэттилэр. Маннык ис хоһоонноох мунньах аны ахсынньы ыйга былааннанар, диэн Олохтоох дьаһалта пресс-сулууспата иһитиннэрэр.