Арыгы маҕаһыыннарын бэрэбиэркэни бырааһынньыкка күүһүрдүөхтэрэ

Ол туһунан Олохтоох дьаһалтаҕа куорат прокурора Виктор Умеренко, Административнай хамыыһыйа кыттыылаах мунньахха бэлиэтээтилэр.

Куорат баһылыга Евгений Григорьев арыгынан эргинии сокуонун тутуһуу хонтуруола саҥа дьыл бырааһынньыктарыгар өссө күүһүрүөҕэ диэтэ.

Административнай хамыыһыйа иһитиннэрбитинэн, бу иннинэ бэрээдэги кэһээччилэр испииһэктэригэр киирбит 20 «туочукаттан» 10-на административнай эппиэтинэскэ тардыллан, уопсайа 1 мөл. 410 тыһ. солк. кээмэйдээх ыстараап олохтоммут. Саҥардыллыбыт испииһэккэ эмиэ 20 «туочука» киирбититтэн 14-дэ – инники өттүгэр эппиэтинэскэ тардылла сылдьааччы. Кинилэр ыстарааптарын кээмэйэ 1 мөл. 240 тыһ. солк.

Эриэйдэлэр көрдөрөллөрүнэн, арыгы «туочукалара» бары кэриэтэ баһаартан сэрэхтээх буолуу быраабылаларын, санитарнай-эпидемилогическай ирдэбиллэри тутуспаттар, сорохтор хонтуруоллуур уорганнар бэрэбиэркэлэригэр араас сылтаҕынан мэһэйдэһэллэр, сир сокуонун кэһээччилэр кытта бааллар, диэн Олохтоох дьаһалта пресс-сулууспата иһитиннэрэр.