Арыгы баҕайы туохха тиэрдибэтэҕэ баарай эбэтэр биилкэлээх ороспуой

Бу дьыл олунньу 5 күнүгэр биир киһи арыгы иһэн баран, атын киһи төлөпүөнүн күүс өттүнэн өттөйөн, былдьаан ылбыт. Онтубут да көннөрү былдьааһын буолбатах, биилкэнэн түһээһиннээх!

Куорат биир түүҥҥү кулуубугар гражданин А. бэрдэ суохтук “бырааһынньыктаабыт”. Аһыы утах обургу кини мэйиитин толкуйдуур дьоҕурун ончу сүтэрбит чинчилээх. Түүн 3 чаас саҕана билбэт уола маҥан смартфону тутан олорорун көрөн, чугаһаан кэлбит уонна паролун сотторон баран,  төлөпүөнүн киниэхэ биэрэригэр модьуйбут. Ким баҕа өттүнэн бэйэлээх бэйэтин баайын биэриэ этэй, биллэн турар, аккаастаатаҕа. Онуоха хайаан да сыалын ситэн тэйэр санааттан, биилкэни хаба тардан ылаат, төлөпүөннээх уолу... үстэ-хаста иһигэр, сиһигэр анньааччы буолбут! Бэйэтэ кэлин билиммитинэн “куттаары эрэ гыммыт” үһү. Оннук да буолбут: анараа барахсан хайыа баарай, блокировкатын устан баран, төлөпүөнүн биэрэригэр тиийбит.

А. төлөпүөнү баһылаат, чехолун устан бырахпыт уонна доҕотторун кытта салгыы атын кулууптары кэрийэ барбыт. Төһө эрэ кэм ааспытын кэннэ, кини да буоллар, син өйдөнүөхчэ буолбут быһыылаах. Айаннаан иһэн билэр уолугар бу төлөпүөнү атын киһиттэн былдьаан ылбытын уонна эбиитин э... тэп диэбиккэ дылы биилкэнэн түһүөлээбитин кэпсээбит. Истээччитэ бу ороспуойдуу быһыы буоларын быһаарбыт, син биир тутуллуоҕун эппит. Ол кэнниттэн ол кэпсээбит уолун кыыһын нөҥүө анараа төлөпүөнүн былдьаппыт уол кыыһын булбуттар. “Сир – кыараҕас” диэн манныгы этэн эрдэхтэрэ. Ол кэннэ “төлөпүөнү булан ылбыттарын” туһунун сообщение суруйан сурулаппыттар  уонна ол күнү аһарбакка эрэ курьеры ыҥыран, төлөпүөнү төттөрү ыыппыттар.

Оттон кэмҥэ холуобунай дьыала көбүтүллээри сэлиэстийэ баран быданнаабыт эбит. Төлөпүөнүн былдьаппыт киһи кулууп иккис этээһигэр тахсан, официантан төлөпүөнүн уларсан, полицияҕа эрийбит. Кулууп камерата, хата,  күүһүнэн өттөйөөччү тахсан иһэрин дьэҥкэтик устубут эбит. Эспэртиисэ биилкэ суоллара эмсэҕэлээбит киһи иһигэр, сиһигэр хаалбыттарын бигэргэппит.

Суут бу дьыаланы көрөн баран, биилкэлээх ороспуой РФ Ук 162 ыст., 2 чааһыгар эппиэттиир буруй буоларын быһаарбыт. Бу ыстатыйанан буруйданааччы уон сылга диэри күлүүс хаайыытыгар түбэһэр кыахтаах. Ол эрээри төннөрбүтүн иһин уонна эрдэ сууттана сылдьыбатаҕын быһыытынан,  сымнатан  буолуо, куорат суута буруйдаах А-ҕа 2 сыл кэтээн көрөр болдьохтоон, 3 сыл  көҥүлүн усулуобуна быспыт. Буруйдаах уонна эмсэҕэлэнээччи да табыллар быаларыгар, хата, эчэйии өлүүгэ тиэрдибэтэх. Түмүк букатын да хобдох буолуон сөбө. Онон сатаан испэт аата, кыраадыстаах утахха ончу чугаһаабатах көнө.