Арктика иистэнньэҥнэрин сөҕүмэр холобурдара

Кулун тутар 19-21 күннэригэр Дьокуускайга «Мир Арктики–2026» диэн ааттаах региональнай дьаарбаҥка-быыстапка 8-с төгүлүн ыытылынна. Бу киэҥ далааһыннаах, улахан суолталаах тэрээһиҥҥэ 18 улуустан кытыннылар.

Кыттааччылартан биирдэстэрин, ыраах Абый улууһуттан сылдьар  үөлээннээҕим Клара Черемкина туһунан кылгастык сырдатыахпын баҕарабын.

Кинини бэйэтин кытта билсиэм иннинэ хаартыскатын көрбүтүм. Онно сыалыһар балык тириититтэн тигиллибит сэлиэччиги кэтэн, оннук дьоҕус суумканы тутан турарын сонурҕуу, хайдах эрэ соһуйа көрбүтүм. Сотору Дьокуускайга Арчы дьиэтигэр буолар тэрээһиҥҥэ кэккэлэһэ олорон, билсэн, хаартыскаҕа сэҥээрбит таҥаспын, суумкатын тутан-хабан, имэрийэн астыммытым. «Сүүстэн истибиттээҕэр биирдэ көрбүт ордук» диэн итини этэн эрдэхтэрэ. Клара Михайловна онно кылгастык балык тириитин кытта хайдах үлэлэһэрин кэпсээбитэ.

Ол күнтэн ыла кинилиин алтыһар, кини оҥоһуктарын интэриэһиргиир буолбутум. 

Бу аҕыйах хонуктааҕыта эмиэ Арктика күннэрин чэрчитинэн үөрэ-көтө көрүстүбүт. Манна даҕатан эттэххэ, хоту улуус дьоно барахсаттар маннык тэрээһиннэргэ олус да ыарахан сыанаҕа кэлэллэр эбит. Холобура, бу Абый маастардара Арктика күннэригэр сөмөлүөтүнэн кэлэ-бара 120 тыһ. солк. төлөөн кыттыбыттар. Сөҕүмэр сыана!

Клара Михайловна Өксөкүлээх Өлөксөй аатынан Норуоттар доҕордоһууларын дьиэтигэр дьаарбаҥка-быыстапкаҕа хас да үлэтинэн кытынна. Манна оҕо чуораанчыктардаах кыһыҥҥы көстүүмэ, Белай Гора бөһүөлэк гербэтэ, үрүҥ кырса түүтүттэн олбох, таба бытыгыттан, кус төбөтүттэн суумкалар, сыалыһар тириититтэн эриэн үөн, түөскэ кэтэр киэргэл, о.д.а.

«Погремушка» диэн оҥоһуга дьон болҕомтотун олус тарта. Маастар собо хабахтарын хатаран баран, иһигэр собо уҥуохтарын уган, тыаһыыр гына оҥорбут. Оонньуур тутааҕа – сыалыһар кутуруга.

Уопсайынан, бу үс күннээх быыстапка сөҕүмэр талааннаах дьону түмпүт эбит. Тэрээһин кэмигэр төгүрүк остуол тула олорон уопут атастаһа олорор маастардары көрөн, чугаһаан билистим. Бу – Мария Аммосова (Эбээн Бытантай), Элина Гузаирова, Евдокия Константинова (Эдьигээн)  уонна, биллэн турар, кэпсээним дьоруойа – Клара Черемкина – этилэрэ.

Бу тарбахтарыгар талааннаах, көмүс илиилээх дьону кытта алтыһан баран, кинилэр муударайдарын, талааннарын, сатабылларын сөхтүм, махтайдым. Ордук биһиги, күннээҕи олоххо наадыйбакка, суолта биэрбэккэ, быраҕан иһэр малбытын (кус, куобах түүтэ, балык тириитэ, уҥуоҕа, бэл диэтэр, хабаҕа уо. д. а.) туһаҕа таһаараллара хайҕаллаах, махталлаах дьыала.