Аркадий Алексеев: «Ытырбыппын ыыппат киһибин»

Аркадий Алексеев, чахчы, саха саарына. Элбэх ырыа маастарын иитэн таһаарбыт үтүөлээх, норуотугар хас да көлүөнэ уостан түһэрбэккэ ыллыыр, аныгы тылынан эттэххэ, хит ырыалары бэлэхтээбит дэгиттэр артыыс, көһөҥө талаан. Бу туһунан билсээри, «Киин куорат» ытык кырдьаҕаска эрийэ сырытта.

89-с хаарыгар сылдьар Аркадий Михайлович куолаһа чэгиэн. Социальнай ситимҥэ сурук тарҕана сылдьар диэбиппитин, бассааба да суох боростуой төлөпүөннээҕин эттэ.

– Кырдьык, Култуура сылынан Мэҥэттэн төрүттээх биэс ааттаах-суоллаах ырыа айааччыга анаан бырайыактаахпын. Онтубар харчы көрдөөн бу күннэргэ улаханнык тиритэ сырыттым. Оройуонум култууратыгар Валерий Ноев, Виталий Андросов, Анастасия Варламова, Галина Шахурдина уонна бэйэм ырыаларбынан бырайыактаах тиийбиппин, «Харчы суох, бүддьүөппүт барыта быһыллыбыта» диэн бастаан аккаастаан ыыппыттара. Төһө да сааһырдарбын, спортсмен буоллаҕым, ытырбыппын ыыппат, дьирээлэһэн тэйэр киһибин. Онон 600 тыһ. солк. бүддьүөттээх куонкуруспар улуус салалтата 200 тыһ. солк. үбүлүөх буолан үөртэ. Уоннааҕытын спонсордартан көрдөөн саҕалаатым, – диэн сонунун үөрэ үллэстэр Аркадий Михайлович.

Онон, дьэ, 16-тан үөһэ саастаах ырыа куттаах дьоҥҥо үөрүүлээх сонун – муус устар 4 күнүгэр куораттан субу көстөн турар Аллараа Бэстээххэ Мэҥэ Хаҥалас биэс биллэр ырыа айааччытыгар аналлаах «Көтөллөр көмүс дорҕооннор» ырыа күрэҕэ былааҥҥа киирбит.

Гран-при кыайыылааҕын 200 тыһ. солк. күүтэр, иккис-үһүс миэстэлээхтэргэ туһааннааҕынан 50, 30 тыһ. солк. олохтоммут.

Маны сэргэ биир ааптар ырыатын бастыҥ толоруу иһин 30-туу тыһ. солк. кээмэйдээх бириис күүтэр.

Санатар буоллахха, Аркадий Алексеев өр сылларга «Ыллаа, эдэр саас», «Сүрэхтэр кэпсэтэр кэмнэрэ» ырыа күрэхтэрин ситиһиилээхтик ыытан, элбэх норуот талааннааҕын таһаарбыт ырыа куонкурустарын ааптара, «Эдэр саас», «Айан», «Дайар сахалар» хас да көлүөнэ култуура маастарын иитэн таһаарбыт бөлөхтөр тэрийээччилэрэ.

Штанганы көтөҕүүгэ, хайыһарга, гиирэни анньыыга дэгиттэр спортсмен, чэпчэки атлетикаҕа өрөспүүбүлүкэ 28 төгүллээх, Уһук Илин, Сибиир сэттэ төгүллээх чемпиона, пятиборьеҕа Москва куорат чемпиона. 1964 сыллаахха Петропавловскай-Камчатскайга үҥүүнү 62,8 м кыыраппыт рекорда күн бүгүҥҥэ диэри куоһарыллыбакка турар.

Аркадий Михайлович былырыын дойдутугар Хаатылыма диэн маҕаһыын да, аптека да суох, Аллараа Бэстээхтэн аһаан-таҥнан олорор дьоҕус учаастакка даача, баанньык туттан, муус устартан ыкса күһүҥҥэ диэри онно олорор. Квадроцикл атыылаһан, чугастааҕы тыаҕа көтүтэн тахсан сир астыыр, тэллэйдиир. «Тутуу ыыта сылдьан, хата, сиспин эчэтэ сыстым»,  – диэн кэпсээннээх.

Онон, сахалар, чахчы да, чиргэл тиит курдук күүстээх санаалаах, ытырбыты ыыппат «хайдах эрэ омуктарбыт». Оннук эр хоһуун дьоммут үксүү, ыллам ырыабыт ыллана турдун!