Ардах халааныттан эмсэҕэлээбиттэргэ өйөбүл тэҥ буолуохтаах

Маныаха аналлаах мунньахха бэҕэһээ Тыа хаһаайыстыбатын управлениетын исписэлиистэрэ эбии үбүлээһин боппуруоһа көрүллэ сылдьарын иһитиннэрдилэр. Маны сэргэ тыа хаһаайыстыатын министиэристибэтин кытта субсидия кээмэйин улаатыннарыы боппуруоһа быһаарылларын бэлиэтээтилэр. Ол курдук, хоромньу кээмэйэ ааҕыллыбытын кэннэ, судаарыстбаннай өйөбүл миэрэлэрин көрүҥнэрин оҥоруу туһунан быһаарыы ылыллыахтаах.

Маныаха Куорат дууматын тыа хаһаайыстыбатыгар сис кэмитиэтин салайааччыта Иван Салатюк субсидиянан өйөбүлү кэтэх хаһаайыстыбаларга кытта көрөргө, тыа хаһаайыстыбатын бородууксуйатын оҥорон таһаарааччыларга барыларыгар, хаһаайыстыба көрүҥүттэн тутулуга суох, өйөбүл баар буолуохтааҕын туһунан этии килдлэрдэ.

Сиргэ сыһыаннаах өссө биир боппуруоһунунан тыа хаһаайыстыбатын аналыгар туттуллар сирдэр көрүлүннүлэр. Мунньах кыттыылаахтара бэлиэтээбиттэрин курдук, кэлиҥҥи кэмҥэ тыа хаһаайыстыбатын сирдэрин атын категорияҕа көһөрөр, чуолаан дьиэ туттарга атыылааһын түгэннэрэ баар эбит. Куораты тутууга уонна архитектураҕа департамент бэрэстэбиитэллэрэ бэлиэтээбиттэринэн, маннык түгэҥҥэ Муниципальнай инспекция управлениетыгар биллэриллиэхтээх. Ону кытта куорат генеральнай былаана тыа хаһаайыстыбатын сирдэрин атын категорияҕа көһөрөрү көрбөт.