Арассыыйа саҥа олохтоохторун социальнай өҥөлөрүттэн быстах кэмҥэ быһар наадатын эттилэр

Арассыыйа Генеральнай борокуратуурата Арассыыйа гражданствотын саҥа ылбыт дьоҥҥо тэҥ социальнай төлөбүрдэри уонна чэпчэтиилэри пааспардарын ылбыттарыттан ыла ханнык эрэ болдьох ааспытын кэннэ биэрэргэ этии киллэрдэ. Бу туһунан генеральнай борокуруор Александр Гуцан Федерация Сэбиэтин сыллааҕы отчуотугар эттэ.

Этии Куттал суох буолуутун сэбиэтигэр хайыы үйэ ыытылынна. Гуцан кини этиитин өйүүллэригэр эрэнэрин биллэрдэ. Бу көҕүлээһин элбэх оҕолоох мигрант ыаллар дьиэ-уот субсидиятын уочарата суох ылалларын, оттон олохтоохтор кыбартыыраларын сылы-сыллаан кэтэһэллэрин уонна бу балаһыанньаны сөбө суох дии саныылларын туһунан СМИ иһитиннэриилэриттэн маннык санааҕа кэлбитин Генеральнай борокуруор бэлиэтээтэ.