Арассыыйа үрдүнэн саамай ааҕар оскуола – Дьокуускайга

Арассыыйа үрдүнэн 14 оскуола библиотеката кыайыылаах аакка тиксибит, ону сэргэ 20 оскуола призер статуһун ылбыт.

Бэлиэтээн эттэххэ, куонкурус 2025 сыл атырдьах ыйыгар Арассыыйа бэрэсидьиэнэ Владимир Путин анал сорудаҕынан саҕаламмыта.

Алена Александровна Попова, Дьокуускай куорат 25 №-дээх орто оскуолатын информационнай-библиотечнай киин сэбиэдиссэйэ, Дьокуускай куорат оскуолаларын библиотекаларын методическай түмсүүтүн салайааччыта, СӨ култууратын туйгуна:

– Күрэххэ Арассыыйа 89 субъегыттан 2000 тахса сайаапка киирбит. Биһиги «Алын кылаас үөрэнээччилэрин ааҕыыга көҕүлүүр систиэмэ» диэн бырайыагынан кытынныбыт. Цифровизация уонна бэчээт тылыгар интэриэс намтыыр кэмигэр оҕоҕо ааҕыы култууратын иҥэрии соруга ордук ыарахан. Бырайыакпыт үөрэнээччилэри барыларын хабар, ааҕыы эйгэтин тэрийэр кыаҕы көрдөрөн, дьүүллүүр сүбэ биһирэбилин ылла. Кинигэ нөҥүө биһиги инникибитин оҥоробут — өйдөөх, киһилии сиэрдээх буола улаатабыт диэн сыалы-соругу оҕолор өйдөөтүлэр.