Арассыыйа олохтоохторо арыгыны уонна табаҕы аҕыйаттылар

«Арыгыны уонна табаҕы туһаныы намтааһына бэлиэтэнэр — бүгүн биһиги дойдубутугар оннук түмүктэр бааллар, уонна бу намтааһын атыы-эргиэн кээмэйигэр олоҕурбут статистика дааннайдарынан бигэргэнэр», — диэтэ Мурашко.

ВОЗ чахчытынан, табахтааһын эрдэ өлүү уонна хроническай ыарыылар биир сүрүн төрүөттэрэ буолар. Сыл аайы аан дойдуга 8 мөлүйүөнтэн тахса киһи табах содулуттан өлөр, ол иһигэр табах буруотун сабыдыалыгар сылдьар дьон эмиэ киирсэллэр. Эмчиттэри көннөрү табаҕы таһынан вейптэр, никотиннаах бородууксуйалары тарҕатар электроннай систиэмэлэр уонна да атын никотиннаах оҥоһуктар дьайыылара долгутар. Куттала суох табах диэн суох, никотин тутулуга киһи доруобуйатыгар бары уорганнарыгар уонна систиэмэлэригэр куһаҕаннык дьайар.

Санатар буоллахха, ыам ыйын 25–31 күннэригэр Саха сиригэр Бүтүн аан дойдутааҕы табахтан аккаастаныы күнүгэр (ыам ыйын 31 күнэ) анаммыт нэдиэлэ буола турар.

Нэдиэлэ чэрчитинэн тэлэбиидэнньэҕэ мэдиссиинэ үлэһиттэрин кытта көрсүһүүлэр, СМИ-гэ сэрэтэр матырыйааллар таһаарыылара уонна ыам ыйын 30 күнүгэр 09:00-13:00 чч. Доҕордоһуу болуоссатыгар «Чөл куорат» эдэр дьон аахсыйалара былааннанар.