«Арассыыйа — мин историям» түмэлгэ мультимедийнэй быыстапка аһылынна

Быыстапкаҕа өрөспүүбүлүкэ бары тыйаатырдара кытталлар, онтон саамай улахан электроннай экспозиция өрөспүүбүлүкэ аҕа тыйаатырын туһунан — манна 1891 сылтан күн бүгүҥҥэ диэри Нуучча тыйаатырын бастыҥ артыыстарын туһунан билиэххэ сөп, диэн ГАРДТ пресс-сулууспата иһитиннэрэр.

Аһыллыы сиэригэр труппа эмиэ чаҕылхайдык кытынна. Бастакы актер Фёдор Волков оруолун Шохруз Шепелев толордо, нуучча актёрскай оскуолатын төрүттээччи Михаил Щепкин оруолун – Александр Сердюков, Константин Станиславскайы – Дмитрий Юрченко, оттон Мария Ларина уонна Татьяна Медвинская «Евгений Онегин» испэктээктэн быһа тардыыны көрдөрдүлэр.

Бу күн РФ театральнай диэйэтэллэрин сойууһун бочуоттаах наҕараадаларынан Вера Келле-Пелле, 1976 сылтан 2023 сылга диэри тыйаатыр сүрүн худуоһунньуга, РФ искусствотын үтүөлээх деятелэ Николай Попов уонна 1980-с сыллар бүтүүлэригэр тыйаатыр режиссёра Пётр Колбасин наҕараадаланнылар.

Бырайыак РФ Култуура министиэристибэтин уонна Бэрэсидьиэн Пуондатын култуурунай көҕүлээһиннэрин өйөбүлүнэн олоххо киирдэ.

«150 артистов. Союз театральных деятелей» саҥа быыстапкаҕа Саха сирин көрдөрөр экспозицияҕа Суорун Омоллоон аатынан Опера уонна балет тыйаатыра, Аҕыйах ахсааннаах норуоттар тыйаатырдара, Александр Пушкин аатынан Нуучча тыйаатыра, Былатыан Ойуунускай аатынан Саха тыйаатыра, Кыыл Уолун аатынан Үҥкүү тыйаатыра, Ньурба тыйаатыра, Олоҥхо тыйаатыра, Куукула тыйаатыра, Эдэр көрөөччү тыйаатыра, Босиков аатынан Музыка Үрдүкү оскуолата уонна Посельскаялар ааттарынан Балет оскуолата кытталлар. 

Киириитэ - босхо.

Быыстапка кулун тутар ыйга Москваҕа ВДНХ үлэлээбитэ. Салгыы Арассыыйа бары историческай музейнай комплекстарыгар туруоҕа.