«Арассыыйа – мин историям» паарка ыҥырар

Билэргит курдук, ыам ыйын 9 күнүгэр Аҕа дойду сэриитигэр ситиһиллибит Улуу кыайыы 81 сылын бэлиэтиэхпит. Бу бэлиэ күҥҥэ анаан, бу история мультимедийнай паарката эһиэхэ анаан киэҥ хабааннаах сэргэх бырагырааманы бэлэмнээбит.

Ол курдук, Улуу Кыайыы ситиһиллибит өрөгөй күнүгэр бу дьоһуннаах пааркаҕа кэнсиэр, фронттан кэлбит суруктарга олоҕурбут тыйаатыр туруоруулара, лиэксийэлэр, киинэ көрдөрүүтэ, патриоттуу аахсыйалар буолуохтара.

Күнүс 12 чаастан саҕалаан киэһэ 17 чааска диэри бырааһынньыктааҕы бырагыраама эһигини күүтэр. Ол иһигэр Автодорожнай уокурук быраабатын өйөбүлүнэн, Дьокуускай куорат уус-уран самодеятельнай кэлэктииптэрин бэртээхэй кэнсиэрэ буолуоҕа.

Улахан саалаҕа мэдиссиинэ (эмчит) бастакы көмөтүн оҥорууга маастар-кылаастар, «Стрелок» уонна «Сапёр» ыстаансыйалар күрэхтэһиилэрэ, БПЛАны көтүтэн көрдөрүү буолуоҕа.

«РМИ. Кыайыы» бэстибээл бэлиэ тэрээһинэ — «Быыһыырга уонна тыыннаах эргилиннэрэргэ. Улуу Кыайыыга мэдиссиинэ фрона» диэн саҥа мультимедийнэй быыстапка арыллыыта күнүс 14:30 ч былааннаммыт.

Бу экспозиция Аҕа дойду Улуу сэриитин кэмигэр байыаннай медиктэр дьоруойдуу үлэлэрин  сырдатар.  Араанньы буолбут байыаһы уоттаах сэрии хонуутуттан таһаарыы хас биирии түһүмэҕин, мэдиктэр дьоруойдуу быһыыларын, хайдахтаах курдук уустук усулуобуйаҕа кинилэр мөлүйүөнүнэн саллаат сырдык тыынын быыһаан, тыыннаах хаалалларын ситиспиттэрин көрдөрөр ис хоһоонноох.  Байыаннай быраастар, мэдиссиинэ сиэстэрэлэрэ, санитарнай инструктордар уонна бааһырбыт байыастар, саллааттар уобарастара болҕомто киинигэр ууруллар. Хирург скальпела фроҥҥа штык тэҥэ улахан оруоллааҕа, госпиталга баар койка ахсаана ангарга баар сөмөлүөт киэнин саҕа улахан суолталааҕа, онтон элбэх тутулуктааҕа.

Күн устата история пааркатын бастайааннай өрүккэ турар экспозициялара эмиэ баар буолуохтара, 1-кы этээс фойетыгар «ИЛ-2 Штурмовик» оонньууга холонорго сөптөөх оонньуур зона үлэлиэ. Күнүс киинэ саалатыгар 13.00 –  14:30 чааска кылгас метражтаах киинэлэр буолуохтара. Ханнык киинэлэр көстөллөрүн история пааркатын официальнай канаалыгар билсиэххэ сөп.

Бу улахан тэрээһини Автодорожнай уокурук быраабата, “Воин” киин, Дьокуускайдааҕы кадеттар интэринээттээх оскуолалара уонна ДОСААФ кыттыһан тэрийэллэр.

Санатан эттэххэ: Дьокуускайга түстэммит «Арассыыйа — Мин историям» — Арассыыйаҕа дойду былыргытыттан саҕалаан аныгы кэмигэр диэри көрдөрөр история муҥутуур улахан, киэҥ хабааннаах мультимедийнэй экспозиция холбоһуга буолар. Холбоһук хас да быыстапка туонатыттан турар. Онно история матырыйааллары аныгы сыыппара технологиятын уонна интерактивнай көрүҥү туһанан, олус өйдөнүмтүө, хараҕыҥ иннигэр субу баар гына көрдөрөллөр.

Манна даҕатан эттэххэ, күн бүгүн дойду үрдүнэн 26 мультимедийной паарка уонна көһөрүллэ сылдьар мобильнай паарка үлэлиир.