Арассыыйа күнүттэн — Сабантуйга

Самаан сайыммыт сатыылаан, киһи таһырдьаттан киириэн баҕарбат. Эбиитин куораппытыгар араас интэриэһинэй тэрээһин күннэтэ кэриэтэ тиһигин быспакка ыытыллар.

Арассыыйа күнэ сэргэхтик ааста

Бастаан Арассыыйа күнүн тэрээһиннэрэ буолбуттара. Холобур, Өрөспүүбүлүкэ болуоссатыгар иһирэх кэнсиэр, быыстапка, атыы-тутуу буолбута. Онтон аҕыйах түгэни көрөҕүт.

Үбүлүөйдээх Сабантуй Саха сиригэр буолла

Оттон бэс ыйын 13–14 күннэригэр уруулуу Татарстан Өрөспүүбүлүкэтин үбүлүөйдээх XXV Федеральнай Сабантуйа буолан ааста. Татарстан баһылыга Рустам Минниханов салайааччылаах улахан дэлэгээссийэ бүтүн сөмөлүөтүнэн кэлэн барда. Араас көрсүһүүлэр, театральнай туруоруу, кэнсиэр, корэшка уонна мас тардыһыыга күрэхтэһии, төрүт дьарыктарыгар үөрэтэр маастар-кылаастар, олохтоохтор, ыалдьыттар күүстэринэн быыстапкалар буоллулар.

Үс сыллааҕыта Татарстан баһылыга Үс Хатыҥ ыһыаҕар сылдьан, астынан, сэргээн барбытын уонна хайаан да манна Сабантуй ыытыан баҕарарын эппитин иһиттэххит буолуо. Сахалар төрүт үгэспитин, сиэрбитин-туоммутун илдьэ сылдьарбытын сөҕөн-махтайан турар. Рустам Минниханов Саха сиринээҕи Татарстан общинатыгар массыына бэлэхтээх кэлбит. Тэрээһин аһыллыытыгар көлө күлүүһүн туттарда.

Мас рестлиҥҥэ кыайыы кынаттанан, Дьулустаан Ноговицын-Таас Боотур “Рысь Пикап” вездеход бириистэннэ. Корэшка Татарстантан Радик Салахов бастыҥынан быһаарыллан, “Лада Гранта” массыыналанна. Бириистэри өрөспүүбүлүкэ баһылыктарын аатыттан туттардылар.

Татарстаннар бу курдук эрэгийиэннэринэн сылдьан, төрүт бырааһынньыктарын, үгэстэрин билиһиннэрэр буолбуттара быданнаабыт. Эһиил Омскайга ыытыллар эбит. Уобалас бырабыыталыстыбатын бэрэссэдээтэлин солбуйааччы Иван Колесник сахалар хайдах ыытарбытын анаан көрө кэлбитин, биһирээбитин эттэ. Ил Дархан Айсен Николаев киниэхэ бырааһынньык көһөрүллэ сылдьар боруонсаттан оҥоһуллубут кынаттаах Тулпар аты туттарда.

Ааптар хаартыскаҕа түһэриилэрэ.