Арассыыйа күнүгэр анаммыт тэрээһиннэр

Ол курдук, бэлиэр бэс ыйын 8 күнүттэн саҕалаан, нэдиэлэ устата куорат муниципальнай бибилэтиэкэлэригэр туһааннаах тиэмэҕэ анаммыт быыстапкалар, бэсиэдэлэр, маастар-кылаастар буола тураллар. Оҕо күнүс сылдьар, туругун чэбдигирдэр лааҕырдара эмиэ сэргэх тэрээһиннэри торумнаабыттар. 

Бэс ыйын 11-12 күннэригэр, Дьокуускай 4-с нүөмэрдээх Оҕо-ыччат спортивнай оскуолатыгар, Арассыыйа күнүгэр сыһыаран, уолаттар ортолоругар дьоҕус футболга куораттааҕы турнир тэриллэр.

Буолар сирэ – Короленко аатынан уулусса 42/1 нүөмэрэ.

Күн устата “Арассыыйа былааҕа” аахсыйа ыытыллыа: түннүктэргэ уонна балконнарга дойдубут былааҕа кэрэтийиэ.

*Бэс ыйын 11 күнэ, чэппиэр:

Сарсыарда 11 чаастан Кангалаас түөлбэтигэр түстэммит “Горняк” култуура киинигэр “Арассыыйабын таптыыбын” диэн чопчу тиэмэлээх анал бырагыраама күүтэр.

Күнүс 12 чааска Маҕан бөһүөлэгин “Ритм” култуура киинигэр “Арассыыйа бэлиэлэрин көрдүүбүт” квест-оонньуу буолар.

Күнүс 15 чааска, Табаҕа бөһүөлэгин историяны-кыраайы үөрэтэр түмэлигэр «Табаҕа тыыннаах историята» экскурсияҕа ыҥыраллар. Буолар сирэ – «Искра» кулууп.

*Бэс ыйын 12 күнэ, бээтинсэ

Күн устата Өрөспүүбүлүкэ, Орджоникидзе, Доҕордоһуу болуоссаттарыгар “Триколор России” аахсыйа ыытыллар.

Сарсыарда 9 чаастан 14 чааска диэри – Өрөспүүбүлүкэтээҕи “Сомоҕолоһуу сүүрүүтэ-2026” полумарафон буолар. Сүүрүү 11 чаастан саҕаланар.

Ыытыллар сирэ – Куорат муниципальнай тэриллиилэрин күнүскү чэбдигирдэр лааҕырдарыгар

11 чааска – Марха түөлбэтин “Пульс” култуура-чэбдигирдэр кииҥҥэ “Биһиги модун Арассыыйабыт” диэн Арассыыйа күнүгэр анаммыт флешмоб буолар.

11 чааска – Дьокуускай 5-с №-дээх ДЮСШ-тыгар оскуола үөрэнээччилэрин ортотугар футболга уонна оҕунан ытыыга күрэхтэһии тэриллэр. Буолар  аадырыһа – Халтурин уул. 17/1нүөмэрэ.

11-12 чааска, Орджоникидзе болуоссатыгар – «Албан аатырдабыт эйигин, Арассыыйа» ИДьМ Саха сиринээҕи салаатын «Служба 02» вокальнай ансаамбылын ырыаһыттара, Г. Кривошапко аатынан судаарыстыбаннай филармониятын уонна Д.К. Сивцев-Суорун Омоллоон аатынан Опера уонна балет судаарыстыбаннай тыйаатырын артыыстара кыттыылаах бырааһынньыктааҕы кэнсиэр. 

Бу күн «Арассыыйа полициятын кытта биир күн» диэн иһитиннэрэр-пропагандалыыр аахсыйа ыытыллыа.

- каадыр үлэһиттэрэ дойду ИДьМ тэрилтэлэригэр үлэҕэ киирии  уонна туһааннаах салаа идэлээхтэрин бэлэмниир үөрэх кыһаларын үөрэххэ туттарсыы быраабылаларын билиһиннэриэхтэрэ.

- кинологтар анал үөрэтиини ааспыт ыттар сатабылларын көрдөрүөхтэрэ.

- эспиэр-криминалистика эспэртиисэтин хайдах ыыталларын билиһиннэриэхтэрэ;

- сэп-сэбиргэл, пилота суох көтөр аппарааттар уонна сулууспаҕа туттуллар 4 тиэхиньикэ быыстапката тэриллиэ. Бу барыта Орджоникидзе болуоссатыгар буолар.

12 чааска итиннэ  нэһилиэнньэни салалта эҕэрдэлиэ.  

12.00 – Пригороднай бөһүөлэгэр Култуура дьиэтигэр Арассыыйа күнүгэр анаммыт «Арассыыйа историята» викторина ыытыллар.

12.00 – «Арассыыйа – мин күндү көмүс кыраайым» диэн, Маҕан бөһүөлэгин «Ритм» култуура кииниттэн Сугун күөлгэ диэри сатыы дьон туура саҕаланыа.

12.10 –  Орджоникидзе уонна Өрөспүүбүлүкэ  болуоссаттарыгар Арассыыйа Федерациятын эдэркээн гражданнарыгар үөрүүлээх быһыыга-майгыга дойду пааспарын туттарыы бэлиэ тэрээһинэ күүтэр.  

12.15 – 13.00 – Орджоникидзе болуоссатыгар Росгвардия  Биэдэмэстибэни таһынан манабыла «Всегда на страже» бырааһынньыктааҕы бырагырааманы бэлэмнээбит. Ол иһигэр:

-Росгвардияҕа үлэҕэ киирии бэрээдэгин туһунан кэпсиэхтэрэ.

- Росгвардия үлэһиттэрэ сатабылларын көрдөрүөхтэрэ.  

- Сэп-сэбиргэл, сулууспаҕа туттар икки тиэхиньикэ көрдөрүүгэ туруо.

 13.00 – Сыырдаах бөһүөлэгин В.С. Дмитриева аатынан  «Алгыс»  кулуубугар оҕолорго анаан, «Арассыыйа – мин дойдум!» биллэрэр-көрдөрөр, сэргэхситэр оонньуу буолуоҕа.

16.00 – Тулагыга, М.П. Обутова-Эверстова аатынан култуура киинигэр Арасыыйа күнүгэр анаммыт «Триколор страны родной» гражданскай-патриотическай аахсыйа тэриллэр.

17.00 – Табаҕа бөһүөлэгин «Кедр» култуура киинигэр «Мин Арассыыйам!» диэн, дойдуга биллэриллибит норуоттар сомоҕолоһууларын күнүгэр сыһыаран, анал байыаннай дьайыы кыттыылаахтарын өйүүр Аһымал кэнсиэр ыытыллар.  

19.00 – Маҕан бөһүөлэгин «Ритм» култуура дьиэтигэр «Үҥкүүлээ Арассыыйа!» диэн ыччакка анаммыт сынньалаҥ киэһэтэ тэриллэр.