Арассыыйа худуоһунньуктара Туймаада ыһыаҕын үйэтитиэхтэрэ

Худуоһунньуктар Дьокуускайга кэлэ сылдьар сыаллара-соруктара – Улуу Туймаада хочотун Үрүҥ Тунах Ыһыаҕар аналлаах монументальнай болотуналар серияларын суруйуу.

Дмитрий Садовников бэлиэтээбитинэн, кинилэр бу сайын номнуо ыһыах арыллыытыгар үлэлээн саҕалаабыттар. Ол этюдтарынан салгыы хартыына оҥорон таһаарыахтаахтар.

Айар үлэҕэ ыччат көхтөөх кыттыыны ылыаҕа. Ол курдук,  А.Д. Макарова аатынан култуура колледжын устудьуоннара кыталыктар уобарастарын айарга көмөлөһүөхтэрэ. Олоҥхоһут уобараһа Олоҥхо тыйаатырын артыыһа Анастасия Алексеева кыттыылаах айыллыаҕа.

Пленэр түмүгүнэн биир улахан болотуна суруллан тахсыахтаах.

Бырайыак өрөспүүбүлүкэ салалтата Арассыыйа художестволарын академиятын кытта түһэрсибит сөбүлэҥин чэрчитинэн П.П. Романов аатынан Дьокуускайдааҕы художественнай училище өйөбүлүнэн 2032 сылга Дьокуускай куорат култуурунай нэһилиэстибэтин федеральнай таһымҥа көрдөрөр сыаллаах олоххо киирэр.