Арассыыйа Дьоруойун туһунан киинэни устуохтара

Арассыыйа Дьоруойа Андрей Григорьев-Тута туһунан киинэ устуохтара. Бу туһунан Ил Дархан «Саха» НКИХ ханаал «Якутия, вперед!» биэриитигэр иһитиннэрэн турар.

Айсен Николаев бэлиэтээн эппитинэн, Дьоруой туһунан киинэни устарга Арассыыйа араас хампаанньатыттан этии киирбит, ол эрээри, киинэ прототиба буолуохтаах Андрей Григорьевы кытта сүбэлэһэн баран, бу киинэни олохтоох киинэ устааччылар оҥороллоро ордук диэн быһаарбыттар. Киинэни устуу тэрээһинин өттүгэр Донецкай Норуодунай Өрөспүүбүлүкэ көмөлөһүө. Ил Дархан киинэ бүддьүөтүн быһа холуйан билэллэрин, успуонсардыырга бэлэм хампаанньалар номнуо баалларын, ол эрээри бастаан киинэ сценарийа оҥоһуллан бигэргэтиллэрэ наадатын, бу үлэни уһаппакка саҕалыылларыгар эрэнэллэрин туһунан санаатын үллэһиннэ.

Киинэни устар туһунан өссө Санкт-Петербурга норуоттар икки ардыларынааҕы XXVIII экономическай форум (ПМЭФ) кэмигэр кэпсэппиттэр. Онно ДНӨ баһылыга Денис Пушилины кытта көрсөн, эрэгийиэннэр икки ардыларынааҕы бииргэ үлэлээһин, Арассыыйа Дьоруойа Андрей Григорьев-Тута туһунан уус-уран киинэни устуу боппуруостарын дьүүллэспиттэр.