Арассыыйа Дьоруойа Алексей Петров харысхала

Түмэл 1982 сыллаахха  арыллыбыт, 2025 сылтан түмэли төрүттээччи, Аҕа дойду сэриитин бэтэрээнэ, идэтинэн эмчит, норуот маастара, талааннаах муосчут, скульптор Анисим Григорьевич Прокопьев аатын сүгэр. Сүрүн экспозицияларга өбүгэ олоҕо-дьаһаҕа уонна Аҕа дойду Улуу сэриитин историята турар.

Марианна Борисова, түмэл научнай үлэтин методиһа:

Биһиги төрөөбүт сирбит былыргыта, хайдах сыллар уонна дьыллар ааспыттара, хайдах уһулуччу санаалаах дьон олорон ааспыттара – барыта түмэл сэдэх экспонаттарын нөҥүө кэпсэнэр.

Түмэлбит биир оннук экспонатынан биир дойдулаахпыт, Арассыыйа Дьоруойа Алексей Петров харысхала уонна кини тус формата буолар.

Кини Арассыыйа Байыаннай күүһүн саллаата, гвардия ефрейтора, 39-с гвардейскай мотострелковай Краснознаменнай биригээдэ штурмовой этэрээтин хамандыыра этэ. Түмэлгэ Дьоруой бэйэтэ бэлэхтээбит, бойобуой суолун көрдөрөр байыаннай кителэ, фуражката уонна Анал байыаннай дьайыыга киниэхэ харысхал буолбут Чебурашката харалла сыталлар.

Алексей Рафаэлович биһиги түмэлбитигэр иккитэ сылдьыбыта. Бастаан 2025 сыл бүтүүтэ – Албан аат аудиовизуальнай саала аһыллыытыгар бочуоттаах ыалдьыт буолбута. Тиһэх сырыытыгар, кулун тутар 23 күнүгэр, дойдум дьоно көрө-истэ сырыттыннар диэн, бэйэтин форматын уонна харысхалын –Чебурашка оонньуурун бэлэхтээбитэ.

Алексей Рафаэлович срочнай сулууспаҕа сылдьан баран, Арассыыйа Оборонаҕа министиэристибэтин кытта хантараак түһэрсибитэ. 2024 сыллаахха бэс ыйыгар Анал байыаннай дьайыы зонатыгар ыытыллыбыта, 39-с отдельнай гвардейскай мотострелковай Кыһыл Знаменнай биригээдэ штурмовой этэрээтигэр сулууспалаабыта. Онно хамандыырынан ананан, 9 кимэн киирэр дьайыыга кыттыбыта, Донбасс олохтоох пууннарын Украина байыаннай чилиэннэриттэн босхолообута. Командование байыаннай сорудаҕын толорор кэмигэр ыарахан бааһырыылары ылбыта. АБДь-га  көрдөрбүт хорсун быһыытын иһин үрдүк судаарыстыбаннай наҕарааданан бэлиэтэнэн, Арассыыйа Дьоруойа аат иҥэриллибитэ.

Хорсун быһыыта

Алексей Петров салайааччылаах штурмовой этэрээт «Спартак» мас учаастагар байыаннай сорудаҕы толорбута. Украина пилота суох көтөр аппарааттарын кимэн киириилэрин түмүгэр гвардия ефрейтора ыарахан бааһырыыны ылбыта. Ол эрээри былдьаһыктаах позицияларын аҕыс хонук устата тутан олорбута. Атаака кэмигэр хас даҕаны пулеметнай пууннарын, Украина байыаннай чилиэннэрин урусхаллаабыта.

Госпиталга эвакуацияламмытын кэннэ, быраастар Алексей Петров икки атаҕын ампутациялыырга күһэллибиттэрэ. Дьиэтигэр төннөн кэлэн, кини олох усулуобуйатын тупсарар сыалтан, кэнчээри ыччаттарын кытары көрсөн-билсэн, тулууру уонна төрөөбүт дойдуга бэриниилээх быһыыны, тапталы көрдөрөн, сэриигэ сылдьар бырааттарын өйөөн, дойдутугар үтүө үлэни салҕаабыта.

Арассыыйа Дьоруойа Алексей Рафаэлович Петров 2026 сыллаахха муус устар 25 күнүгэр олохтон туораабыта.