Арҕаа фроҥҥа – Алдантан

1941 сыллаахха бастакы хомуурга ыҥырыллан, Алдантан арҕаа фроҥҥа барбыт. Калининскай уобаласка Москва аттыгар 675-с артиллерийскай полка үһүс батареятыгар сылдьыбыт. Онтон Арҕаа Украинаҕа 120 мм пушка иитээччитинэн сылдьан, 1943 сыллаахха ыстыыгынан киирсиигэ иһигэр улаханнык бааһыран, госпитальга эмтэммитэ. 139-с гвардейскай стрелковай полкаҕа «Катюша» иитээччитинэн сылдьан, Белоруссия хас да оройуоннарын, Баранович куораты босхолоспута. Ити куорат аттыгар 3 фашиһы билиэн ылан, штабка туттарбыта. Ол сылдьан атаҕын дэҥнээбит.

Сэрии бүппүтүн да кэннэ 1945 сыл балаҕан ыйын 1 күнүгэр диэри Украина истиэптэригэр миинэни ыраастааһыҥҥа сылдьыбыта.

Илья Никитич Албан аат 3-с истиэпэннээх уордьанынан, элбэх бойобуой мэтээллэринэн, Аҕа дойдуну көмүскүүр Улуу сэрии 1-кы истиэпэннээх уордьанынан наҕараадаламмыта.

Илья Никитич уонна Анна Саввична Потаповтар Сиэйэ сэлиэнньэтин биир ытык-мааны, төһүү ыала этилэр. Кинилэр алта оҕону төрөтөн, барыларын үөрэхтээн, сүһүөхтэригэр туруорбуттара, билигин өрөспүүбүлүкэ араас муннуктарыгар үлэлии-хамсыы, айа-тута сылдьаллар.

Нарыйаана Ефимова-Владимирова,

Дьокуускай куорат 12-с №-дээх орто оскуолатын  7 «В» кылааһын үөрэнээччитэ