Бастыҥ механизатор ким буолара билиннэ

Бэҕэһээ Саха сиригэр аан бастакытын ыытыллар, Бүтүн Арассыыйатааҕы “Идэтигэр бастыҥ” диэн идэ маастарыстыбатыгар күрэхтэһии “Механизатор” номинациятыгар күөн күрэс эрэгийиэннээҕи түһүмэҕэ буолан ааста. Онно үс механизатор – Хаҥалас улууһун «Хачыкаат» тыа хаһаайыстыбатын оҥорон таһаарар кэпэрэтиибиттэн Семен Татаринов, Дамир Дмитриев уонна СӨ «Сир мелиорациятын уонна тыа хаһаайыстыбатын уунан хааччыйыы управлениета» ГБУ-тан Александр Атласов  – кытталларын бэҕэһээ сырдатан турабыт.

Бастакы күҥҥэ механизатордар теорияны төһө билэллэрин тургуппут буоллахтарына, сарсыныгар дьиҥ олоххо сатабылларын (практика) көрдүлэр. Ол курдук, кыттааччылар “Беларусь” тыраахтары ыытар сатабылларын, уматык уонна гидравлика тиһигэ хайдах үлэлиирин төһө сөпкө быһааралларын, двигатель тутулугар төһө быһаарсалларын уонна кээмэйгэ төһө сөпкө быһаарсан, оҥороллорун (выполнили точные замеры) көрдүлэр-иһиттилэр.

Икки күннээх күрэхтэһии түмүгүнэн бастыҥ механизатор үрдүк аатын Александр Атласов ылла. Инньэ гынан кини хомуур үлэтэ үмүрүйбүтүн кэннэ бу күһүн Тамбов уобалаһыгар ыытыллар Арассыыйа таһымнаах күрэххэ өрөспүүбүлүкэ аатын көмүскүү барар буолла. Киниэхэ ситиһиилэри баҕарыаҕыҥ. Иккис миэстэни – Дамир Дмитриев, үсүһү Семен Татаринов ыллылар.