Анна Ефимова: “Уолаттар долгуйаллар, харахтара ууланар”

“Олунньу 18 күнүттэн 27-гэр диэри биир бастыҥ волонтербут Дария Федоровна Павлованы кытта командировкаҕа баран кэллибит.

Биһиги сыалбыт-сорукпут диэн тирэх пууҥҥа тиийэн аадырыстаах баһыылкалары наардааһын этэ. Мантан барыта 5 тыһыынча кэриҥэ баһыылканы ыыппыппыт. Онтон сорохторун байыастар  туппатахтар, ол биричиинэтин билсэ, инникитин хайдах гыннахха чопчу аадырыһыгар тиийиэн сөбүй диэн опорник уолаттары кытта сүбэлэһээри баран кэллибит.

Бэйэбитин кытта 500-тэн тахса киилэ гуманитарнай көмөнү илдьэ барбыппыт. Аҕа дойдуну көмүскээччилэр күннэригэр сөп түбэһинэрэн волонтердар бэйэбит күүспүтүнэн бэлэх оҥорон 100 устууканы илдьибиппит, ону таһынан тэрилтэлэр көмөлөспүттэрэ. Ол курдук спорт бэтэрээннэрэ элбэх суумаҕа эмп-томп атыылаһан биэрбиттэрэ, Уус Алдан Хомустааҕыттан ынах этин аҕалбыттара, Дьокуускай куорат олохтоохторо Никитиннэр дьиэ кэргэн убаһа этэ биэрбиттэрэ. Ол эти эрийэн волонтердар бэрэски буһарбыппыт, собо ыһаарылаан илдьибиппит, Бэйдиҥэттэн Сивцевтэр дьиэ кэргэнтэн, Мэҥэ Хаҥалас Тумулуттан, Өлөчөйүттэн, Кэбээйиттэн собо балык кэлбитэ, ону барытын бэлэмнээн уолаттар тута ыллылар да сииллэрин курдук астаабыппыт. Сорох эппитин буһаран, бытархай балыктарбытын хатаран уха оҥорон, ону таһынан соботтон алаадьылаан илдьибиппит. Утуйар мөһөөчччүктэри, термобельелары, ис таҥаска тиийэ ылан барбыппыт, Никольскай храм суорҕан бөҕөтө аҕалбыттара.

Бастаан тиийэн сүбэ бэрээдэгинэн мунньах оҥорбуппут, онно турар баһыылкалары хаартыскаҕа түһэрбиппит. Кимнээх, кимиэнэ буоларын байыастар дьонноругар эрийэн чопчулуубут, хомойуох иһин, сорохтор Груз-200, сорохтор госпитальга сыталлар. Ону дьонноро Груз-200 баһыылкаларын биир дойдулаахтарыгар биэртэлээҥ диэн көҥүл биэрбиттэрэ.

Бэлэххэ диэн 100-тэн тахса чебурашканы илтибит. Чебурашка саллааттарга эйэ бэлиэтэ, үтүө санаалаах, улахан чуор кулгааҕа ыраахтан дрон көтөн иһэрин истэн бэлиэ биэрэр, байыастары харыстыыр, араҥаччылыыр диэн суолталаах. Маны таһынан Раиса Николаевна Тимофеева кинигэтин илдьэ барбыппыт, манна өрөспүүбүлүкэ  алгысчыттара байыастарга анаабыт алгыстара киирбиттэр. СӨ былаахтарын, шевроннары уо.д.а. илдьэн туттардыбыт.

Байыаннай чаастарга сырыттыбыт, бэлэхтэрбитин түҥэттибит, астарбытын биэртэлээтибит, наһаа үөрдүлэр, оруобуна Аҕа дойдуну көмүскээччилэр күннэригэр байыастар мустан сиэхпит диэтилэр. Дьоннорун кытта төһө кыалларынан сибээһи тута олороллор эбит. Уолаттар биһигини көрөн дэлби долгуйдулар, харахтара ууланна, бэйэбит да уйадыйан ыллыбыт. Анараа сорох сиргэ хаар сытар, сорох сиргэ от көҕөрөн эрэр.

Баһыылкалар тустарынан этэр буоллахха, сорох төрөппүттэр уолаттарын харыстааннар контактарын биэрбэттэр, кистэлэҥ чааска сылдьаллар диэн. Олор тиийбэккэ тураллар эбит. Ол иһин төрөппүттэргэ, кэргэттэригэр этиэм этэ, баһыылкаҕыт чопчу тиийиэн баҕарар буоллаххытына, дааннайдарын биһиэхэ кистээбэккэ биэриэххитин наада, оччоҕо 100 бырыһыан тиийэригэр мэктиэ баар. Араас хайысханан сыталлар, наар биир сиргэ сытыарбаттар, көһөрөн кэбиһиэхтэрин сөп, онон контага суох байыаһы тирэх пуун волонтердара хайдах да булбаттар, ол иһин эбэһээт суруйуохха наада, оччоҕо аадырыгар тиэрдэллэр.

Бу баран кэлбиппитигэр махтаныам этэ “Вместе к Победе” өрөспүүбүлүкэтээҕи координационнай киин салайааччыта Георгий Сергеевич Куркутовка, кини барытын кэпсэтэн айаҥҥа туох да харгыһа суох сырыттыбыт. Москваҕа Поспредство таһаҕаспытын ылан көрсөн тирэх пууҥҥа диэри илтилэр. Антах эмиэ опорниктар көрсөннөр туһалаах сырыы буолла диэн бэлиэтиибин. Маны таһынан этинэн-аһынан көмөлөспүт дьоммутугар, үс сылтан тахса буор-босхо үлэлии сылдьар ийэлии сыһыаннаһан, ис сүрэхтэриттэн тигэн, баайан биэрэр бэйэм волонтердарбар барҕа махтал тылларын этэбин.