Андаатар бэргэһэлээх куоратчыт

Олохтоохтору син билэн бардым. Баһылык мунньах ыытарыгар оробуочайдарын, пиэрмэ үлэһиттэрин да буоллун, барыларын ааттарын, аҕаларын аатын эттэҕинэ, ким да өйдөөбөт, онон хос ааттарын эт дэһэллэр. Дьэ оччоҕуна өйдөөн «сөп, кини эбит», «маарыыҥҥыттан итинник диэххин» эҥин дэһэллэр.

Биирдэ баһылыгым ыҥыран ылан, куоракка каадыр отделын үлэһиттэрин үрдэтэр куурус үөрэҕэр бараҕын диэтэ. Мин оччолорго биир оҕолоохпун, 18 сааспар ыал буолан, куоракка устудьуоннаабатаҕым, сылдьыбытым да ахсааннаах. Арай оҕолонорбор эрэ төрүүр дьиэҕэ сыппытым, ону да нууччалыы билбэт, сатаан кэпсэппэт да этим. Биир түгэни кэпсээн аһардахха, арай төрөөн баран сытабын, сарсыарда быраас киирдэ. Бастакы дьахтарга кэлэн: «У вас стул был?» – диэн ыйытта. Мин толкуй бөҕөтө буоллум, тугу ыйытар баҕайыный диэн. Хата уонча дьахтары эргийэн кэлиэр диэри син өйдөөбүтүм.

Дьэ, куораттыыр буоллум. Кэргэним мин мунаахпын олус диэн билэр, соҕотох ыытарыттан саллар. Аны туран таҥаспын-саппын бэрийии буолла. Нуорка бэргэһэҥ оннугар андаатар обманканы кэтэн бар, устан ылыахтара диэтилэр. Эдьиийим эмиэ тылбай-өспөй буолар, сүбэлии сатыыр. Манна кыбытан эттэххэ, ол нуорка бэргэһэм бэйэтэ туспа остуоруйалаах этэ.

Икки улахан сыалай нуорка тириилээхпин улуус киинигэр баар иистэнньэҥҥэ тиктэрэ ыыппытым. Санаабар туох да наһаа үчүгэй, баай көрүҥнээх, тириитэ кылапачыйан олорор бэргэһэни кэтэспитим. Онтум ханна баарый, тириибин бэйэтигэр ылбыт уонна нуорка кырадаһыннарынан тикпит этэ. Онтубун биирдэ хонтуора дьахталларын кытта бырааһынньыктыы олорон кэпсээбиппэр, туох да сутуруктара күөрэҥнии түспүтэ, арааһа ол иистэнньэҥ баара буоллар, онно тута кумалаан кэбиһиэх көрүҥнээхтэрэ...

Дьэ, дьоллоох Дьокуускайбар кыһыл соппуоскалаах (кэргэним хантан эрэ атыылаһан аҕалбыта, суоппар буолан хомондьуруопкаҕа сылдьара), уһун дыраап сонноох уонна андаатар бэргэһэлээх ЗИЛ массыынанан айаннаабытым. Суоппарым куорат киинигэр, уруккута «Туймаада», билиҥҥитэ «Токко» маҕаһыын аттыгар аҕалан таҥнары сүөкээн кэбистэ. Мин буоллаҕына «Холбос» аттыгар Крупская уулуссаҕа барыахтаах этим, онно дьүөгэм олороро.

Дьиэм нүөмэрин көрдөө да көрдөө, уулусса аатын билии суох, кимтэн да куттанан ыйыппаппын. Аны туран куоратчыт быһыытынан кэһиилээхпин, син ыйааһыннаах суумкалаахпын. Онтон ыксаан биир киһиттэн ыйытан, ыйдаран, олох атын сиргэ турарбын билэн, «Холбос» диэки үнтү сылайан хааман салбаҥнаабытым. Уулуссабын, дьиэбин булан үөрэн-көтөн тиийэн тоҥсуйбутум, ким да арыйбат, дьүөгэм, биллэн турар, үөрэнэ сылдьар буоллаҕа. Ол курдук подъездка турдум, аны хабаҕаран ыксаатым, бу сырыыга харса суохпар түһэн ыалларын аанын тоҥсуйан, көрдөһөн киирдим.

Бука киэһээҥҥэ диэри турдум быһыылааҕа. Дьүөгэм кэлбитигэр мин саҕа дьоллоох киһи суох этэ. Оччолорго төлөпүөн, сибээс хантан кэлиэй, бары да оннук мунан-тэнэн сырыттахпыт.

Оттон мин бэргэһэбэр ончу ким да кыһамматаҕа, миигиттэн мааны чүөчэлэр да бааллара, ханнык да күлүгээҥҥэ түбэспэккэ, төннөрбөр Кангалаас хайатын анныгар туран, куоластаан, чох тиэйэр массыынанан дойдубар этэҥҥэ тиийбитим.

Оннук кимнэр бааллара. Өйдүүгүт дуо?