Анал байыаннай дьайыы кыттыылаахтарын кыһалҕалара быһаарыллар

Анал байыаннай дьайыы кыттыылаахтара куорат баһылыга Евгений Григорьев тус приемугар кэлэн, тыҥаан турар кыһалҕаларын быһаартараллар.

Ол курдук, Михаил К. кулун тутар 3 күнүгэр куорат баһылыга Евгений Григорьев тус приемугар босхо сир учаастагын анатыы боппуруоһунан киирбитэ. Кэпсэтии кэмигэр биллибитинэн, биэс оҕолоох Михаил К. Дьокуускай куоракка бас билэр дьиэтэ суох эбит.  Евгений Григорьев ити кыһалҕанан тута үрдүкү былаас уорганнарыгар эрийэн, 5 уонна онтон элбэх сокуоннай саастарын туола илик оҕолоох ыалларга судаарыстыбаннай өйөбүл – дьиэ атыылаһарга эбэтэр туттарга биир кэмнээх социальнай төлөбүр боппуруоһун быһаартарда. Михаил К. маны сэргэ Дьокуускай куорат территориятыгар босхо сир учаастагын ыларыгар көмөлөһүөхтэрэ.

Анал байыаннай дьайыыга сырдык тыына быстыбыт куорат олохтооҕун огдообото Елена К. саахалланар туруктаах дьиэтин оннугар саҥа кыбартыыраны биэрии боппуруоһун быһаартарта, диэн Олохтоох дьаһалта пресс-сулууспата иһитиннэрэр.

Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).