Анал байыаннай дьайыы кыттыылаахтарыгар сир учаастактарын биэрии бастакы түһүмэҕэ саҕаланна

Олунньу 25-26 күннэригэр Дьокуускай куорат Олохтоох дьаһалтатын Сир сыһыаннаһыыларыгар агентствотын дьиэтигэр бастакы 100 учаастагы биэрии ыытылынна: 50 учаастак – Табаҕаҕа, 50 – Киллэмҥэ.

Бэлиэ тэрээһиҥҥэ куорат баһылыга Евгений Григорьевы сэргэ Куорат дууматыттан бэрэссэдээтэл Альберт Семенов, дьокутаат Александр Северьянов уонна Анал байыаннай дьайыы кыттыылаахтарын дьиэ кэргэннэрин кытта үлэҕэ отдел начаалынньыга Туйаара Колесова кыттыыны ыллылар.

Санатар буоллахха, дойду баһылыга Владимир Путин 2023 сыл бэс ыйыгар анал байыаннай дьайыы кыттыылаахтарыгар социальнай өйөбүл эбии миэрэлэрин туһунан дьаһалынан регионнарга босхо сир учаастактарын биэриини көрөргө көҕүлээбитэ.

Ол чэрчитинэн 2023 сыл сэтинньи ыйыгар Саха Өрөспүүбүлүкэтин Ил Түмэнэ өрөспүүбүлүкэ Сирин кодексатыгар уларытыылары киллэрэн, анал байыаннай дьайыы кыттыылаахтарыгар кэтэх хаһаайыстыбаны туталларыгар уонна дьиэ тутталларыгар анаан сир учаастагын биэрэр туһунан дьаһал ылыллыбыта.

Бүгүҥҥү күҥҥэ Дьокуускай куоракка бу сыалга анаан 1396 учаастак оҥоһуллан турар.

Куорат баһылыга Евгений Григорьев бэлиэтээбитинэн, бу бэлиэ түгэни чугаһатар туһугар икки сыллаах үлэ ыытыллыбыт.

«Сир учаастактарын элбэх оҕолоохторго курдук сэрэбиэйинэн биэрэбит. Бу кэнниттэн аны инфраструктураны тэрийии үлэтэ күүтэр», – диэтэ Евгений Григорьев.

Анал байыаннай дьайыы кыттыылааҕа Илья Магомыжев куорат дьаһалтатыгар махтанан туран, ылбыт учаастагар дьиэ, баанньык туттар былааннааҕын үллэһиннэ.

Үс оҕолоох Елена Чупрова улахан уола анал байыаннай дьайыыга сылдьар. «Бэриллэр учаастактар бары биир сиргэ тураллара үчүгэй эбит. Уолум эмиэ махталын тиэрдэр, дьиэ уонна баанньык туттар баҕалаахпыт», – диэтэ кини.

Бэлиэтээн эттэххэ, аҕыйах хонуктааҕыта Дьокуускай куорат баһылыгын иһинэн Анал байыаннай дьайыы кыттыылаахтарын боппуруостарынан дьарыктанар уопсастыбаннай сэбиэт тэриллибитэ. Сэбиэт сир учаастактарын түҥэтии, сырдатыы, быһаарыы, көмөнү оҥоруу үлэтинэн дьарыктанара сабаҕаланар, диэн Олохтоох дьаһалта пресс-сулууспата иһитиннэрэр.