Анал байыаннай дьайыы кыттыылаахтара уонна кинилэр дьиэ кэргэттэрин чилиэннэрэ саҥа идэлэри баһылыыллар, үлэнэн хааччыллаллар

Саха сиригэр сыл саҕаланыаҕыттан анал байыаннай дьайыы кыттыылааҕа 46 киһи уонна 120 кинилэр дьиэ кэргэттэрин чилиэнэ үлэ миэстэтин булбуттар. Ол туһунан Нэһилиэнньэ дьарыктаах буолуутугар киинин дириэктэрин солбуйааччы Игорь Соловьев иһитиннэрдэ.

Игорь Соловьев бэлиэтээбитинэн, машинист, массыына өрөмүөннүүр слесарь, токарь, медсиэстэрэ, уһуйаан иитээччитэ, администратор, эргиэн менеджерэ курдук идэлэргэ ордук наадыйыы баар.

Маны сэргэ быйыл анал байыаннай дьайыы кыттыылааҕа 11 уонна кинилэр дьиэ кэргэттэрин чилиэнэ 5 киһи оптуобус суоппарын, сыаналаах бородууксуйа контролёрун, социальнай үлэһит, иистэнньэҥ, асчыт, газоэлектросварщик идэлэригэр үөрэммиттэр.

Бүгүҥҥү күҥҥэ дьарыктаах буолуу киинин учуотугар 65 анал байыаннай дьайыы кыттыылааҕа уонна 50 кинилэр дьиэ кэргэттэрин чилиэннэрэ тураллар, диэн Ил Дархан уонна Бырабыыталыстыба пресс-сулууспата иһитиннэрэр.