Анал байыаннай дьайыы кыттыылааҕын, бэтэрээнин уоппуската

Анал байыаннай дьайыыга сылдьар байыас, сокуон быһыытынан, уоппускаланар бырааптаах. Бу туһунан “Жены и СВО” диэн телеграм бөлөҕө соторутааҕыта сырдатан турар. Билсиэҕиҥ.

Бастаан маннык сүбэни үллэстибиттэр: СВО кыттыылааҕа уоппускаҕа сылдьар кэмигэр — полиция бэрэбиэркэлиир түгэнигэр көрдөрөр гына — отпускной лииһин илдьэ сылдьыахтаах.

Сылга биирдэ, уоппускаҕа дойдутугар айанныырыгар диэн, 6 суукка бэриллэр.

Оттон төлөбүрэ суох, босхо айанныыр быраап Уһук Хоту оройуоннарга, Ураллааҕы, Сибиирдээҕи, Уһук Илин уокуруктарыгар хантыраак түһэрсэн сулууспалыыр байыаннай сулууспалаахтарга эрэ баар. Сылга биирдэ көрүллэр.

🔘 Ханнык түгэннэргэ тус  төрүөтүнэн уоппуска көрдүөххэ сөбүй?

Чугас аймах — төрөппүт, кэргэн, кэргэн төрөппүтэ, оҕолор, бииргэ төрөөбүт быраат, балты эбэтэр байыаннай сулууспалааҕы иитэн таһаарбыт киһи ыараханнык ыарыйдаҕына эбэтэр олохтон туораатаҕына.

Байыаннай сулууспалаах дьиэ кэргэнин эбэтэр чугас аймахтарын дьиэтэ-уота уокка былдьаннаҕына эбэтэр атын айылҕа аҕалар иэдээнигэр түбэстэхтэринэ.

Байыаннай сулууспалаах дьиэ кэргэнигэр баар буолара наада атын ураты түгэннэргэ. Манна сыбаайба, оҕо төрөөһүнэ киирсэр. Онуоха байыаннай чаас хамандыырын көҥүлэ быһаарар оруоллаах.

Тус  төрүөтүнэн бэриллэр уоппуска уһуна — 10 суукка.

Мантан салгыы СВО бэтэрээннэригэр сыһыаннаах киирбит:

Бэтэрээннэргэ — байыаннай сулууспалаахтарга 15 сууккалаах эбии уоппуска күнэ диэн көрүллэр. Бу сылга туһаммакка, кэлэр сылга көһөрүөххэ сөп. Сотуллубат.

27.05.1998 N 76-ФЗ "Байыаннай сулууспалаахтар статустарын туһунан" Федеральнай сокуон 5.1 ыст. 11 п. олоҕурар.

Эбии уоппусканы көрдүүрүгэр бойобуой дьайыы бэтэрээнэ маннык хабааннаах рапорт суруйуохтаах:

"1998 с. 27.05. N 76-ФЗ «Байыаннай сулууспалаахтар статустарын туһунан» Федеральнай сокуон 5.1 ыст. 11 п. сөп түбэһиннэрэн, бойобуой дьайыылар бэтэрээннэригэр көрүллэр 15 сууккалаах эбии уоппусканы биэрэргитигэр көрдөһөбүн".

Ону таһынан Госдума СВО бэтэрээнэ төлөбүрэ суох  35 күннээх уоппусканы ылыан сөбүн туһунан сокуону ылыммыта.