Анал байыаннай дьайыы бэтэрээнэ сонун тэрилтэни арыммыт

Бу бырайыагын кини «Своё дело 14» үөрэх бырагырааматыгар билиһиннэрбит. Ол курдук, Лапшиков эрдэ массыына салонун чөлүгэр түһэрэр технологияларынан уонна аквапринт ньыматынан киэргэтии, кырааскалааһын ньымаларын интэриэһиргиир эбит. Онно олоҕуран бырайыак толкуйдаан, «Своё дело 14» үөрэх бырагырааматыгар кыттыбыт уонна, призердар кэккэлэригэр киирэн, 60 тыһ. солк. кээмэйдээх грант ылан, ыра санаатын олоххо киллэрэн саҕалаабыт.

Виктор Лапшиков анал байыаннай дьайыыга бэйэтин санаатынан тиийэн, БМП водитель-мэхээнньигинэн сулууспалаабыт. Сулууспатын кэмигэр икки төгүл бааһырыы ылбыт. Онтон, хантараага түмүктэммитин кэннэ, дойдутугар эргиллэн, «Защитники Отечества» пуонда көмөтүнэн олоҕун саҥаттан саҕалыырга быһаарыммыт. Маныаха координатора Елена Бережневаҕа махтала муҥура суох.

Маҥнай погрузчик суоппарыгар үөрэнэн, биир сыл ситиһиилээхтик үлэлээбит. Сотору Викторы Дьокуускай куорат Олохтоох дьаһалтатыгар Байыаннай сулууспалаахтар уонна кинилэр дьиэ кэргэттэрин кытта үлэҕэ салааҕа кылаабынай испиэлииһнэн үлэҕэ ыҥыраллар. Виктор билигин Юридическай полицейскай колледжка орто анал үөрэххэ үөрэнэр.

Үлэни уонна үөрэҕи тэҥҥэ дьүөрэлиирин таһынан олоххо көхтөөх позициялаах Виктор Лапшиков куорат бары тэрээһиннэригэр кыттар – ыччаты кытта көрсүһүүлэр, бэтэрээннэри кытта үлэ. Ил Дархан уонна Бырабыыталыстыба пресс-сулууспатын матырыйаалынан.