Анал байыаннай дьайыы кыттыылаахтарын боппуруостарынан дьарыктанар уопсастыбаннай сэбиэт баар буолуоҕа

2022 сыл олунньу ыйыгар анал байыаннай дьайыы саҕаланыаҕыттан Аҕа дойдуну көмүскээччи күнэ ураты суолталанна.
Быйылгы бырааһынньыгынан Олохтоох дьаһалта үлэһиттэрин уонна куорат олохтоохторун, кинилэр дьиэ кэргэттэрин Арассыыйа бүтүн үс Доруойа – Александр Колесов, Филипп Евсеев уонна Николай Евдокимов – кэлэн эҕэрдэлээн барбыттарын куорат баһылыга Евгений Григорьев бэлиэ түгэнинэн ааҕар уонна көрсүһүү кэнниттэн Куорат баһылыгын иһинэн Анал байыаннай дьайыы кыттыылаахтарын боппуруостарынан дьарыктанар уопсастыбаннай сэбиэт тэриллэр буолбутун иһитиннэрэр.
Сэбиэт сир учаастактарын түҥэтии, сырдатыы, быһаарыы, көмөнү оҥоруу үлэтинэн дьарыктанара сабаҕаланар, диэн бэлиэтиир Олохтоох дьаһалта пресс-сулууспата.
Санатар буоллахха, олунньу 25-26 күннэригэр бастакы 100 байыаска уонна кинилэр дьиэ кэргэттэригэр Киллэмҥэ уонна Табаҕаҕа сир учаастактарын биэрии былааннанар.  
Тэрээһин ыытыллар аадырыһа: 
Октябрьскай уул., 20/1, 3 этээс, (каб. 303), «Сир сыһыаннаһыыларыгар агентство» МХТ
Бириэмэтэ: 09.00 – 12.00 чч. (пааспардаах эбэтэр дэбиэринэстээх кэлэр булгуччулаах).

Анал байыаннай дьайыы кыттыылаахтарыгар сир учаастактарын биэрии туһунан сиһилии 40-80-46 билсиэххэ сөп. 

Санатар буоллахха, босхо сирдэри Дьокуускай куорат военкоматынан мобилизацияламмыт уонна Дьокуускай куоракка регистрациялаах дьоҥҥо аныыллар. Бүгүҥҥү күҥҥэ бу сыалга 1396 учаастак оҥоһуллан турар.