Амма дьэргэлгэнэ тугу түстүүрүй?

Тыа сирин ыаллара хаһаайыстыбаларын көрөр кэмнэрин үгэнэ. Ынах уулатыыта, от киллэриитэ... Арай дэриэбинэттэн Амма эбэ диэки өйдөөн көрбүттэрэ, өрүс нөҥүө таас дьиэ бөҕө кэчигирэспит. Дьикти көстүү олохтоохтору улаханнык соһуппут. Үлэ дьоно төлөпүөннэрин үрдүгэр түһээри гыммыттара, сиэптэригэр суох буолан биэрэн, айылҕа дьикти көстүүтүн өр көрөн турбуттар.

Амма нөҥүө кытылыгар халлааҥҥа харбаспыт үрдүк мэндиэмэннээх дьиэлэр кэчигирээбиттэр. 

Амгалена Новикова быраата баанньык оһоҕун отто сылдьан бу көстүүнү көрөөт: “Көрүҥ, көрүҥ, Амма куорат буолан турар!» – диэбитинэн дьиэтигэр ойон киирбитигэр, эдьиийдээх аҕата түннүгүнэн көрө түһэллэр. Аҕата кыыһыгар видеоҕа уһул диэн соруйбутугар, Амгалена, төлөпүөнүн ыла охсоот, устар уонна статуһугар угар.

«Киин куорат" Аммаҕа сибээскэ тахсан, туох, хайдах, хаһан, ханнык кэмҥэ, төһө өр буолбутун ыйыталаста.

Амгалена Новикова, Чакыр нэһилиэгин кулуубун худуоһунньуга, нэһилиэк ыччатын лидерэ:

– Быраатым сүүрэн киирэн эппитигэр, төлөпүөнүм үрдүгэр түһээт, куухунам түннүгүттэн устубутум. Аммам нөҥүө биэрэгэр мэндиэмэннээх дьиэлэр кэчигирээн туралларын көрөн олус соһуйбуппут. Чахчы дьикти көстүү этэ! Олох чуп-чуолкай! Бастакы санаа – сотору СВО бүтүүһү, барыта этэҥҥэ буолууһу, үлэ-хамнас, сайдыы буолууһу. "Үчүгэйгэ көһүннэҕэ!" – дэһэ түспүппүт. Аҕам: “Сайдыы, тупсуу буолууһу”, – диэбитигэр кыра быраатым: “Мы попали в будущее быһыылаах”, – диэн саҥа аллайбыта. Бу көстүү лоп курдук 12:00 чааска сүтэн хаалбыта. Ити күн халлаан 25-26 кыраадыска диэри сылыйбыта.

Устуубун тута бассаапка статуспар туруорбутум. Элбэх киһи сэргээбитэ.

«Киин куорат” бу түгэн метеорология өттүттэн тугу бэлиэтиирин билсэр сыаллаах Дьокуускайдааҕы күнү-дьылы кэтээн көрөр станцияҕа тахса сырытта.

Синоптик-метеоролог Саргылана Анатольевна Никитина:

– Ити уһуллубут күҥҥэ, бириэмэҕэ, биһиги көрдөрүүбүтүнэн, былыттаах күн этэ. Оттон устууга былыта суох, күөх халлаан көстөргө дылы. Онон туох да диэн этэр кыаҕым суох.

Кыһыҥҥы кэмҥэ, нууччалыы  эттэххэ, мираж үгүс буолар. Ити салгын оонньуутуттан тутулуктаах.

Мираж, салгын температурата араастаһыытыттан сардаҥа токуруйан, киһи хараҕа ылбат ырааҕар баар дьиҥнээх эбийиэктэри көрдөрүөн сөп. Онон бу өйгө оҥорон көрүү буолбатах, хартыыналары "айан таһаарар" дьиҥнээх айылҕа көстүүтэ. Холобур, сайыҥҥы куйааска ип-итии аспаалга, үөһээҥҥи салгын тымныытын суотугар, чалбах сытарын көрүөххэ сөп. Дьиҥэр, бу халлаан күлүгэ уу буолан көстөр. Онон мираж дьиҥнээх, олоххо баар көстүү буолан, хаартыскаҕа түһэриллэр.

«Дьэргэлгэн ойуутун түһэрэн” диэн ырыа тыллара мээнэҕэ суруллубатах эбит. Чахчы даҕаны, айылҕа дьикти көстүүтэ!