"Алые паруса" — хас биирдии выпускник ыра санаата

Оҕолору Эрмитажка көрсөн кэпсэттибит.

Суруналыыс идэтин таларга быһаарыммыт Кристина Неустроева  "Киин куорат" таһаарыыга санаатын үөрүүнэн үллэһиннэ:

 —  Биһиги Өймөкөөн улууһун Томтор оскуолатын 5 кыыс, 4 уол буолан бүтэрдибит. Бу сыллар тухары бэйэ-бэйэбитин кытта дьиҥнээх доҕоттор буоллубут. Арассыыйа таһымнаах "Алые паруса" оскуоланы бүтэрээччилэр бары ыра  санаалара буолар тэрээһиҥҥэ тутуспутунан кэллибит.
Мин маннык бырааһынньык баарын кыра эрдэхпиттэн билэбин. Араас сылларга буолар "Алые паруса" тэрээһини телевизорынан астына, ымсыыра көрөрүм. Ону быйыл бэйэбит тус кыттыыны ылар дьоллоннубут. Бэйэҥ кыттарыҥ, тутан туран көрөрүҥ 
диэн олох атын, олус дириҥ уонна күүстээх иэйии буоларыттан сүрдээҕин долгуйабын.
Өймөкөөн — Саха сирин ыраах, тымныы уонна олус кэрэ айылҕалаах улууһа. Биһиги маннык ыраахтан кэлиибит — төрөппүттэрбит бэлэхтэрэ. Биһигини кытта 4 төрөппүт уонна кылааспыт салайааччыта Любовь Павловна кэллилилэр. Бу айан биһигини өссө чугаһатта, олохпут биир саамай кэрэ өйдөбүнньүгэ буолла.
Онон төрөппүттэрбитигэр, учууталбытыгар 
бу курдук ураты бэлэҕи оҥорбуттарыгар муҥура суох махтанабыт.
"Алые паруса" — саҥа олох саҕаланыытын, улахан ыра санаалар туолууларын бэлиэтэ. Онон хас биирдии выпускникка олоҕун  суолун таба тайанарыгар, талбыт үөрэҕэр туттарсан киирэригэр, ыра санаалара олоххо киирэллэригэр ис сүрэхпиттэн баҕарабын.
Оскуолабыт биэрбит билиитэ-көрүүтэ инникибит диэки эрэллээхтик хардыылыырбытыгар куруук тирэх буоллун!
Эһиги баар буолаҥҥыт, биһиги маннык үөрүүлээх кэмнэри тэҥҥэ көрсөбүт.

Сарсын киэһэ саамай сүрүн тэрээһин иннинэ мааны рестораҥҥа үөрүүлээх банкеппыт буолуоҕа. Онно бары бииргэ мустан, үөрэхпитин бүтэрбиппитин бэлиэтиэхпит. Онтон Санкт-Петербург болуоссатыгар «Алые паруса» кэрэ көстүүтүн илэ харахпытынан көрө барыахпыт.

Олус улахан киэн туттуу — биһиги бу сырыыга бэйэбит Өймөкөөн улууспутун эрэ буолбакка, бүтүн Саха сирин, төрөөбүт Өрөспүүбүлүкэбитин ааттатарбыт. Бу биһиэхэ улахан эппиэтинэс уонна чиэс буолар!