Алта сылаас туалет баар буолуоҕа. Хаһан?

Олортон, бүгүҥҥү күҥҥэ, иккитэ эрэ үлэлиир – Таалай күөл кытылыгар уонна Саха тыйаатырын кэннинэн. Сарсыарда 09:00 чаастан киэһэ 21:00 чааска диэри үлэлииллэр, төлөбүрдэрэ – 50 солк.

Куорат уопсастыбаннай туоналарын дириэксийэтигэр иһитиннэрбиттэринэн, куорат пааркатыгар сылаас туалеты атырдьах ыйыгар үлэҕэ киллэрэр сорук турар. Туалет босхо дуу, төлөбүрдээх дуу буоларын паарка салалтата быһаарар. Бэлиэтээн эттэххэ, манна кыра оҕолоох ийэлэргэ аналлаах «Мамин дом» диэн дьиэҕэ төлөбүрдээх (50 солк.) сылаас туалет үлэлээбитэ хаһыс да сыла. Оттон Опера уонна балет судаарыстыбаннай тыйаатырын уонна Октябрьскай уокурук управатын икки ардыларынан туруохтаах сылаас туалет эмиэ атырдьах ыйыгар үлэҕэ киирэрэ былааннанар.

Киин куорат» хаалбыт 2 сылаас туалет «дьылҕатын» билистэ. Ол курдук, бу сайын Кыайыы болуоссатын уонна Кырдьаҕас куорат таһыгар икки туалет баар буолуохтара диэн суруйан турабыт. Хомойуох иһин, билигин даҕаны үлэҕэ киирэ иликтэр.

Кырдьаҕас куоракка туруоруллубут туалеты бүгүн, атырдьах ыйын 12 күнүгэр, миэстэтин сыҕарытан биэриэхтээхтэрин туһунан Куорат уопсастыбаннай туоналарын дириэксийэтигэр иһитиннэрдилэр. Санатар буоллахха, от ыйыгар Бүтүн Арассыыйатааҕы история уонна култуура пааматынньыктарын харыстыыр уопсастыба (бэр. Руслан Васильев) Кырдьаҕас куоракка туруоруллубут уопсастыбаннай туалет биллиилээх судаарыстыбаннай уонна уопсастыбаннай диэйэтэл М.К. Аммосов олорбут дьиэтин таһыгар туруоруллубута федеральнай сокуону кэһэрин ыйан турар. Манан сибээстээн СӨ былыргы тутуулары харыстыыр управлениетын салайааччыта Николай Макаров «Киин куоракка» иһитиннэрбитинэн, эбийиэги «кыһыл сурааһынтан» таһааран биэриэхтээх этилэр. Оччотугар сокуону кэһии суох буолар.

* * *

Ити курдук, уопсайа 6 сылаас туалет баар буолуохтааҕыттан бүгүҥҥү күҥҥэ урут үлэҕэ киирбит икки эрэ үлэлиир. Онон Дьокуускай куорат территориятыгар уопсастыбаннай туалет биир сытыы кыһалҕа буолара уҕараабат. Холобура, Кыайыы болуоссата, Орджоникидзе болуоссата, Доҕордоһуу болуоссата, Ленин болуоссата сылы эргиччи дьон тоҕуоруһар сирдэрэ, онно уопсастыбаннай туалет боппуруоһа булгуччу быһаарыллыахтаах. Салгыы Кыайыы паарката, Ийэ искибиэрэ, о.д.а. курдук улахан былаһааккалары ылсыахтарын наада.