Алмас Семянов: Баҕа санааттан куттанымаҥ!

Дьокуускай куорат 17 №-дээх оскуолатын 8-с кылааһын үөрэнээччитэ Алмас Семянов – Арассыыйа, өрөспүүбүлүкэ таһымнаах научнай кэмпириэнсийэлэр кыайыылаахтара, «Арассыыйа наукатын кэскилэ» мэтээл, СӨ инновация министиэристибэтиттэн махтал сурук, 2024, 2025 сылларга «Мин идэм – ИТ» күрэх «Лучший разработчик» хайысхатын кыайыылааҕа уонна хамаанданан күрэххэ 3-с миэстэ  хаһаайына, IT-куб «Повелитель кода», «Хочу все знать о предпринимательстве» күрэхтэрин кыайыылааҕа:

– Иккис кылааска төрөппүттэрим Xbox бэлэхтээбиттэрэ. Дьиҥэр, мин атыны, Nintendo Switch баҕарар этим. Ол иһин, сыанатын биир тыһыынчанан түһэрэн баран, биллэрии биэртим. Тута атыылаһааччы көстөн, баҕалаах оонньуубун атыыласпытым. Бу санаатахха, иккис кылаас оҕотугар хорсун хардыы. Итинтэн саҕалаан тус дьыала, тус дохуот туһунан интэриэһиргээбитим. Билигин Epic Group холдиҥҥа эспиэрдиибин.

14 сааспыттан “самозанятайбын». Онуоха ийэм оруола улахан. Анал кууруска суруйтаран, “ООО”, “ИП”, “самозанятость” диэн өйдөбүллэри үөрэппитим.

Наука эйгэтигэр уолчаан олох да уһуйааҥҥа сылдьан «киирбит»:

– Дьиэбитигэр кондиционера суох этибит. Ол иһин ийэбиниин М-Видео маҕаһыыҥҥа кондиционер атыылаһа барбыппыт. Онно тиийэн, бу тэрил хайдах үлэлиирин билээри, консультаннары ыйытыыларбынан «көмөн» кэбиспит этим.

Алмаһы кытта кэпсэтэ олорон биир санаа киирэр. Оҕо наукаҕа, урбааҥҥа интэриэһэ үптэн-харчыттан, билиини сомсортон эрэ тутулуктаах буолбатах эбит. Холобур, Алмас кондиционер хайдах үлэлиирин хат-хат ыйыталаспытыгар консультаннар «кыра киһи диэтэххэ олус оттомноох, уустук ыйытыылардаах» диэн хайҕаабыттарын кырачаан чөмчөкөтүгэр түһэрэн ылар. “Тобуллаҕас өйдөөх оҕо» диэн хайҕаммытын аны уһуйаана «Бастыҥ чинчийэччи» диэн ааты биэрэн чиҥэтэр. Ол кэннэ аны көмпүүтэрин улахан ночоото суох атыылаан, ыра санаатын ситиһэн хайҕанар. Ол аата оҕону, уопсайынан, улахан да киһини, чахчы үтүө тыл, хайҕал кынаттыыра саарбаҕа суоҕун бу Алмас Семянов чаҕылхай холобура туоһулуур.

– Наукаҕа кыайыыбын IT-Кубка дьарыктыыр учууталым Мирослав Васильевич Матвеевы кытта ситимниибин, – диэн Алмас Семянов учууталыгар махтанар.

Алмас урбааҥҥа да, наукаҕа да былаана киэҥ. Олортон биирдэстэринэн Minecraft оонньуу бырагырааматын оҥоруу буолар. Онтугар бүк эрэллэээх.

– Баҕа санааттан куттанымаҥ! Урбаан эйгэтэ биир хардыыттан атын хардыыга иннин диэки баран иһэр. Саамай кылаабынайа онно итэҕэс, аллараа түһүү баар эбит да буоллаҕына,  бу – хотторуу буолбатах! Бу – сайдыы! – диэн Алмас үөлээннээхтэригэр сүбэлиир.