Алгыһы иҥэринии кистэлэҥэ

Афанасий Семенович ФЕДОРОВ - алгысчыт:

– Алгыс тылын өйүнэн-санаатынан ылынар киһи эрэ иҥэринэр, көмө оҥостор кыахтанар.

Итэҕэлбит быһыытынан, алгыска эккинэн-хааҥҥынан ырааһыран, өйгүн-санааҕын түмэн бэлэмнэниэхтээххин. Алгыс тылыгар тэҥҥэ олорсон бардаххына, олоххор, үлэҕэр-хамнаскар ситиһиилэнэҕин диэн буолар.

Алгыс тылыгар олорсору эмиэ сатыахха наада. Ол туһугар алгысчыт тылын болҕомтолоохтук, иһийэн, холкутуйан туран истэр куолу.

Ыһыах алгыһын илиилэрин өрө уунан эбэтэр түһүлгэҕэ олорон алгыстаналлар. Оттон ыһыах буолар сиригэр киирбэт дьон син биир ол курдук дьиэҕитигэр олорон эрэ алгыска кыттыһыаххытын сөп.

Алгыс истэр, иҥэринэр дьон бары Айылҕаҕа сүгүрүйүү, Айыылартан уонна Иччилэртэн көрдөһүү, кинилэр үрдүк ааттарыттан уйгуну-быйаҥы, дьолу-соргуну ааттаһыы барарыгар тирэх буолаҕыт. Алгыс хаһан баҕарар көмөлөөх, тирэхтээх буоллаҕына, Үөһээлэргэ диэри тахсар. “Оннук буоллун!”, “Туску буоллун!” диэн тылларынан кыттыһа олордоххутуна, алгыс тыла алкыйан Үөһээ Айыыларга тиийэр ситимнэнэр.

Иван Герасимович ВАСИЛЬЕВ – Алгыс Уйбаан:
– Алгыһы киһи бэйэтин ис туругунан итэҕэйиэхтээх, арыллыахтаах. Алгысчыт, аныгылыы тылынан быһаардахха, спутниктан сигнал биэрэр араадьыйа курдук үлэлиир. Ол иһин онно дьиҥнээхтии холбонон олоруохха наада. Билигин литература элбэх кэмигэр Айыылар суолталарын үөрэтиҥ, ааҕыҥ, билиигитин хаҥатан алгыска бэлэмнэниҥ. Оччоҕо алгыс дьайыытын үчүгэйдик ылыныаххыт.

Эрдэттэн алаадьы астанан сыт таһаарыҥ. Ыһыах мааны аһын астааҥ, кымыс, быырпах бэйэҕит сатаан оҥостубат буоллаххытына, атыылаһан бэлэмнэниҥ диэн сүбэлиэм этэ. Кымыс, быырпах уохтаах утахтар буоланнар, киһи кутун-сүрүн көөнньөрөн таһымын үрдэтэллэр.
Алгыс ылыныаххыт иннинэ уруккуну-хойуккуну ырыҥалаан көрүҥ, өй-санаа өттүнэн сааһыланыҥ, инники былааннаргытын торумнаныҥ. Былааннаах эрэ киһи сайдар, инники баран иһэр киһи эрэ өйө-санаата ыраас буолар.
Маны таһынан сахалыы таҥас, симэх кэтиҥ – сахалыы симэх уонна таҥас хас биирдии оһуора дириҥ суолталаахтар, онон туруккутун өссө күүһүрдүөхтэрэ.
Турук диэн киһи айылҕаҕа холбонор энергията. Хас биирдии киһи айылҕаҕа сигнал биэрэр, ол сигнал информационнай хонууга холбонор.
“Күн улууһа” диэн этиилээхпит. Ол аата солнечнай систиэмэ таһынан бэйэбит баарбытын биллэрэбит. Ону билбит эрэ киһи үлэҕэ-хамнаска, дьоҥҥо-сэргэҕэ дьайыыта күүстээх буолар. Үөрбүт-көппүт, астыммыт, дуоһуйбут киһи дьайыыта Үөһээ тиийэр. Ыһыах күн айдаарсыы, этиһии-охсуһуу суох буолуохтаах. Олохпутугар сыл устата буолбут куһаҕаны барытын ыытан кэбиһиэхтээхпит.