Александр Иванов: «75 сааспын наһаа кырдьаҕас курдук ылынымаары турабын, орто сааспар тиийдим»

Бу күн кини 60 саастаах үбүлүөйүгэр Дмитрий Петрович Коркин кэргэнэ биир ураты түгэни кэпсээбитэ  ахтылынна. Ол маннык эбит.

Дмитрий Петрович дьиэтигэр эбиэккэ киирэн баран эппит: «Дьэ, Сунтаартан кыыс кыраһыабай уол оҕото кэллэ. Кыргыттарбытын аймыыһы. Сунтаар хааннааҕа да биллэр, кыратык киһиргэһэ да баар». Улуу тренер бу уолу хайдах сөптөөх суолга хайыһыннарары тобулбутун истээри мустубут дьон бары чуумпура түстүбүт. Ол ыйытыы-этии хоруйа маннык буолла: Дмитрий Петрович активистканы, кыраһыабай кыыһы Варя Макарованы ыҥыран ылар уонна этэр: «Уйбаныап эбэһээт оскуоланы бүтэриэхтээх».

Дьэ онтон ыла улуу тренер "сорудаҕынан" Варвара уонна Александр Ивановтар маҥнайгы таптал уотун саҕан, ону үйэлэрин тухары бүөбэйдээн, саха биир бастыҥ ыала буолан олороллор. 54 сыл эн-мин дэсиһэн, үс оҕону улаатыннаран, сиэттэрин көрсөн, дьоллоох олоҕу олорон кэллилэр.

- Александр кэргэн быһыытынан олус сымнаҕас, сылдьарын курдук сэмэй. Тустуук быһыытынан ханнык да табыллыбатах түгэнин дьиэтигэр соһон киллэрбэт ураты хаачыстыбалаах. Көбүөргэ балыйтарыыны, тренерэ да суох сылдьыытын, атаҕастабылы даҕаны. Кини да ыйааһын түһэрэн муҥнанара, кини да кыайыы туһугар кыһаллара. Ону дьиэтигэр кэпсээбэтэ. Бу маннык хаачыстыбаны аныгы эдэр тустууктарга баҕарыам этэ, - диир Варвара Афанасьевна.

«Улуу Пехлеван - Александр Иванов» быыстапка арыллыытыгар үгүс үтүө тыл этилиннэ. Сүрүн санаа «ханнык баҕарар ыксаллаах түгэҥҥэ чыпчылҕан өйдөөх, уһулуччу, улахан интеллектээх, бөлүһүөктүү толкуйдаах дьон тустуук буолаллар», «эт-сиин, былчыҥ үлэтигэр хамаанданы өй биэрэр» диэн буолла. Кистэл буолбатах, «тустарга өй наадата суох, күүс наада» диэн санааны соҥнуу сатааһын урут да баара, билигин да баар.

Дьокуускай куорат 3№-дээх ДЮСШ тустууга дьарыктанар кыракый уолчаан тренерин кытта Александр Иванов Олимпиадаҕа ылбыт үрүҥ көмүс мэтээлин көрө тураллар. Петя алтыс кылааска үөрэнэр эбит. Чурапчыга туста бара сылдьан Александр Иванов үөрэммит оскуолатын көрбүт киэн тутта кэпсиир. Бу уолчааны көрөн, саха тустууга оскуолата көлүөнэттэн көлүөнэҕэ бэриллэн, Олимпиадаҕа саха аатын ааттатар дьон тахсалларыгар эрэл санаа охсуллан ааста. Олимпиада мэтээлин илэ хараҕынан көрбүтүн кырачаан тустуук үйэтин тухары өйдүү-саныы сылдьыа турдаҕа эбээт.