«Алдан» киинэ бастакы эрэ күннэргэ 1,42 мөл. солк. тахсаны киллэрбит

ЕАИС чахчытынан, анал байыаннай дьайыы кыттыылаахтарын дьоруойдуу быһыыларын туһунан «Алдан» саха бастакы патриотическай киинэтэ номнуо (ыам ыйын 1 күнүнээҕи туругунан) 1,42 мөл. солк. киллэрбит. 
Бу көрдөрүүнэн киинэ Арассыыйа топ-10 киирбит. 

Санатар буоллахха, «Алдан» — ИТ эйгэтигэр үлэлиирин иһин анал байыаннай дьайыыттан «көҥүлү биэрэр» бронь баарын үрдүнэн, дойду туһугар, дьоҥҥо көмөлөһөр, биир эмэ киһи олоҕун быыһыыр туһугар СВОҕа барарга быһаарыммыт ситиһиилээх урбаанньыт туһунан киинэ. Оттон киинэ дьоруойун дьиҥнээх прототиба — «Киин куорат» хаһыат ыалдьыта Николай Потапов.
Режиссер — буойун-суруйааччы Тимофей Сметанин айымньытынан аатырбыт «Рядовой Чээрин» киинэнэн биллэр Дмитрий Кольцов.

«Алдан» киинэ биир кыайыыта — сүрүн оруолларга Арассыыйа киинэтин сулустара Иван Охлобыстин, Дмитрий Дюжев, Ольга Красько о.д.а. оонньообуттара буолар. Дмитрий Дюжев бу күннэргэ Дьокуускайга кэлэн, киинэ сүрэхтэниитигэр кыттыыны ылан барда. Арассыыйа биллэр, улахан ааттаах-суоллаах артыыстара итинник кэлэн бараллара биһиэхэ сэдэх. «Алдан» киинэ өссө биир уратытынан киинэни киэргэтэр анал компьютернай эффектэри «Якутия» технопаарка оҥорбута буолар. Арааһа, саха киинэтигэр бу бастакы улахан холонуу буолуон сөп. Бэлиэтээн эттэххэ, «Алдан» киинэттэн киирэр үп анал байыаннай дьайыы кыттыылаахтарыгар уонна патриотическай киинэ хайысхатын сайыннарыыга ананар. 

Хаартыска: Ил Дархан уонна Бырабыыталыстыба пресс-сулууспата