Албыҥҥа үктэтии тохтообот

Дьокуускай к. 25 саастаах олохтооҕо дьахтар кирэдьиит ылбыт үбүгэр криптовалюта атыылаһан, дохуот аахсарга санаммыт. Аныгы сибээс көмөтүнэн чуолкайа ким буолара биллибэт киһини сүрүннээччи (куратор) оҥостубут. От ыйыттан саҕалаан балаҕан ыйыгар диэри ол киһи ыйан-кэрдэн, сүбэлээн биэрбит счетугар брокерскай саайка киирэн уонна анал сыһыарыыны туһанан, уопсайа 1 мөл. солк. 660 тыһ. солк. ыыппыт. Түмүгэ, сэрэйиллэрин да курдук, хобдох буолбут. Хантан барыһырыай, хаарыан харчытыттан олоччу маппыт.

Оттон 41 саастаах эр киһи УАЗ массыынатын аанын өстүөкүлэтин автоматика көмөтүнэн кэбэҕэстик түһэр-тахсар гына оҥортороору биир фирманы кытта кэпсэппит. Хомойуох иһин, ол баҕата туолбатах. Ол оннугар 102 тыһ. солк. ытыс соттубут.