Албыҥҥа киирэн биэримэҥ!

Аныгы кэмҥэ араас маркетплейсы туһанан, араас табаары, бородууксуйаны да сурутан ылыы элбээтэ. Кэнэҕэһин бу хайысха өссө сайдан, кэҥээн иһэр бадахтаах. Ол иһигэр биһиги ортобутугар “Валдбериһы” (норуокка Балбаара дииллэр) биһирээн туттааччы үгүс. “Валдбериз” анал сыһыарыытыгар кытта албыҥҥа үктэтэ сатааһын баар эбит. Холобур, Марина диэххэ, өрүү да балачча табаары сакаастаһар үгэстээх. Биир үтүө күн уочараттаах сакааһын ыытан баран, төлөбүрүн эрдэттэн төлөспүт. Онуоха сыһыарыы көстүүлээх сиригэр “Валбериһы” кытта үлэлэһэбин дэнэр биир хампаанньа аахсыйа биллэрэрин, кинилэртэн табаары ылбыт дьоҥҥо сыаналаах бириистэри оонньоторун туһунан иһитиннэрии кэлбит.

Омос көрүүгэ, киһи мантан соһуйара суох, бэл, араас өҥө, уот-той иһин төлөстөххө, “эйиэхэ бонус ананар биитэр чэпчэтии, бириис көрүллэр” диэн сурук тахсааччы.

Инньэ гынан, дьээбэҕэ, ону баттааччы буолбут. Оннук оонньууга кыттарга, үгэс курдук, киһи сылайар сорудаҕа ирдэммэт, холобур, баттаатахха көлүөһэ эргийэр. Бу сырыыга ханна көлүөһэ  тохтообут сиригэр туох уруһуйа баар да – ону сүүйэҕин диэн эбит. Үс холонууттан бииригэр киһибит сыаналаах төлөпүөнү сүүйбүт.

Сыаната сүүстэн тахса тыһыынча үһү. Бээ, тохтоо, онон бүппэтэх, "эн элбэх суумаҕа суруйтарарыҥ, кэлбиттэн аккаастаныыҥ суоҕун иһин, эйиэхэ өссө үстэ холонор кыаҕы биэрэбит" диэн сурук тахсыбыт. Үс холонууттан бииригэр эмиэ сыаналаах андроид төлөпүөҥҥэ түбэспит. Ол кэнниттэн ыйытыы тахсыбыт: “Сүүйүүгүн табаарынан ылаҕын дуу, харчынан дуу?” Марина сэрэх муҥутаан, баан каартатын дааннайын көрдүөхтэрэ диэн, соруйан «табаарынан» диэни талбыт.

Онуоха: “Сөп, билигин эйигиттэн чугас ханнык ыскылаакка бириис төлөпүөннэр баалларын булан, биллэриэхпит” диэн сурук кэлбит. Бэрт сотору буолаат, «Эйигиттэн чугас ыскылаакка итинник төлөпүөннэр суохтар эбит. Онон уу харчынан хайдах ыларгын эпэрээтэр эрийэн биллэриэҕэ» диэн кэлбит. Һэ-һэ, сүүйүү сууматын, дьээбэҕэ, көрүҥ. Биирдэ байа түһүү дуу? Дьэ, үчүгэй ымсыырдыы ээ? Кырдьык эбитэ буоллар, чахчы бэрт буолуо эбит)). Ону баара, өйдөөн кэбиһиҥ — ТУОС АЛБЫН! Марина: «Кэбис, онон-манан моһойон, өйбүн сүүйэн, сөбүлэнэн кэбиһиэм» диэн бэйэтэ бэйэтиттэн сэрэхэдийэн, “Получить денежный приз” диэн суругу көрөөт, кутталы кытта сыһыарыыттан тахсан барбыт.

Сөпкө гыммыт. Албыннаппыт дьон кэпсиириттэн сылыктаатахха, итэҕэйбэккэ да олорон,  киирэн биэрии үгүс. Дэлэҕэ түөкүттэр гипноһу тутталлар дуу диэн санаа кэлиэ дуо! Оннук минньигэс тылларынан ньылҕаардан, итэҕэйбэт да киһини тылларыгар киллэрэр дьикти дьоҕурдаахтар. Дьэ, ити курдук, түөкүттэр араас ньыманы туһанан, албыҥҥа үктэтэ сатыыллар. Сэрэниҥ уонна ону тэҥэ саастаах, итэҕэйимтиэ дьоҥҥутун да сэрэтэр буолуҥ. Сыһыарыыттан атын саайка, сирэйгэ таһаарар туора сигэлэри алҕаһатан да баттаамаҥ. 

Этэҥҥэ буолуҥ, дьон албыныгар киирэн биэримэҥ. Босхо ас – хапкааҥҥа эрэ баар.