Алампа дьааһыга

Суруйааччы Д.К. Сивцев-Суорун Омоллоон норуот күүһүнэн туттарбыт бу түмэлигэр «1886» диэн суруктаах Алампа мас дьааһыга хараллан сытар.

Изабелла Жерготова, Чөркөөх түмэлин үлэһитэ:

– Суорун Омоллоон көҕүлээһининэн тутуллубут Чөркөөх түмэлэ атаҕар турар кэмигэр урукку дириэктэрбит Л.Н. Григорьеваҕа оччолорго «Таатта» сопхуоска үлэлиир, Чөркөөх оскуолатыгар бииргэ үөрэммит табаарыһа Роман Богатырев оройуон киинигэр олорор күтүөтүн аахха – Розалия Романовна уонна Николай Васильевич Поповтарга – Алампа дьааһыга баарын ыйан биэрэр. Людмила Николаевна Ытык Күөлгэ тиийэн: «Чахчы, Алампа дьааһыга эбит!» – диэн кэлэр.

Николай Васильевич Попов

1986 сыллаахха суруйааччы А.И. Софронов-Алампа төрөөбүтэ 100 сылын көрсө сибээс үлэһитэ Николай Васильевич Попов Чөркөөх түмэлигэр Алампа дьааһыгын бэлэхтээбитин туһунан киин хаһыат сырдаппыта.

«1886» диэн суруйааччы төрөөбүт кэмин кэрэһилиир, үрүҥ көмүс тутаахтаах, сиэдэрэй оҥоһуулаах мас дьааһыгы,  чахчы даҕаны, Алампа барахсан бэйэтиттэн араарбакка илдьэ сырыттаҕа.

Иван Егорович Попов-Суруксут Уйбаан

Алампа дьааһыгын уһун сылларга, «түһүүлээх-тахсыылаах» кэмнэргэ, кини чугас аймаҕа, эрдэ Ааллаах Үүҥҥэ таһаҕасчыттарга дьаамсыгынан үлэлээбит, кэлин «Холбоһу» тэрийсибит үөрэхтээх Иван Егорович Попов – Суруксут Уйбаан ууран-харайан сылдьыбыт эбит.

А.И. Софронов-Алампа учуутал инитэ В.И. Софроновы кытта

Суруксут Уйбаан кэргэнэ Екатерина Саввиналыын

Түмэлгэ суруйааччы дьааһыгын сэргэ Алампа учуутал инитэ Василий Иванович Софроновтыын бииргэ түспүт уонна Суруксут Уйбаан бэйэтэ кэргэнэ Екатериналыын (Дьиэбэгэнэ аатырбыт баайа Егор Саввин төрөппүт кыыһа) түспүт хаартыскаларын  бэлэхтээбиттэрэ. Суруйааччы нэһилиэстибэтин үйэтиппит ытык-мааны дьоммутугар барҕа махталбытын тиэрдэбит.

Чөркөөх түмэлигэр баар «1886» диэн ытык бэлиэ суруктаах суруйааччы А.И. Софронов -Алампа мас дьааһыга олоҕун кэрдиистэрин кэпсээн, сырдыкка, кэрэҕэ сирдээтин.