Аделфос: «Инникибин көрбүөччү билгэлээбит буолуон сөп...»

«Курутуой», «өҥнөөх» аат

Дьиҥнээх аата – Василий Бубякин. Амма улууһун Эмис нэһилиэгиттэн төрүттээх. Аҕата суоппар, ийэтэ – нуучча тылын учуутала.

Скетчтэригэр, стендаптарыгар тиэмэлэрин күннээҕи олохтон ылар, арай дьону өссө күүскэ күллэрэр, «быара суох» ыытар туһуттан күүркэтэн, омуннаан-төлөннөөн биэриэн сөп.   

– Саха киһитигэр чугас скетчтэри толкуйдуу сатыыбын. Холобур, бары тыа сиригэр үөскээбит, үлэни билэн улааппыт дьон ардах түстэҕинэ окко барбаппытын билэбит. Оҕолор онтон үөрэрбит. Эбэтэр этиҥнээх ардахха  ийэбит: «Уоту араарыҥ!» – диэн айманара.

Көрөөччүлэрим мин видеоларбын көрөн, оҕо саастарын саныыллар, бэйэлэрин билэллэр. Бэл диэтэр: «Биир эбиппит, барыбытын биир собуокка оҥороллор быһыылаах», – диэн суруйаллар. Онон билиҥҥи уустук кэмҥэ дьон арыый аралдьыйарыгар, саатар аҕыйах мүнүүтэ сынньанан ыларыгар көмөлөһөр инибин диэн эрэнэбин», – диэн кэпсэтиибитин саҕалыыр.

 

Рэп ааҕар уол айар аатын оҕо сылдьан ылыммыт буолан, сорох-сорохтор кинини Аделфостан атыннык ааттаабаттар, Василий диэтэххэ, атыҥырыахтарын да сөп.

– Бука, 12-13 саастаахпар быһыылааҕа. Сыанаҕа тахсан рэптиирбэр көннөрү Вася Бубякин диэнтэн атын, «курутуой», «өҥнөөх» аат наада буолбута. Тылдьыкка гректии араас тыллары көрбүтүм. Ол олорон «аделфос» диэн «быраат, чугас киһи» диэн тылбаастанарын билбитим. Итиэннэ айар аат оҥостон, бачча сааспар диэри Аделфоспун.

Өтө көрүү дуу, дьылҕа дуу?

Артыыс буолар баҕа санаата биир дьикти түгэнтэн күөдьүйбүтэ. Ол сыл дэриэбинэлэригэр көрбүөччү кэлбит. Иннин тымтыктанан көрбүт суох эрээри, саха дьоно айылҕаттан айдарыылаахтар сүбэлэрин-соргуларын истэр, алгыс курдук ылынар үгэстээхпит. Вася ийэтигэр ол көрбүөччү: «Уолуҥ элбэх харах көрөр киһитэ буолуоҕа», – диэбит. Ону ийэтэ дьиэтигэр кэлэн кэпсээбит. Ол саҕана баара-суоҕа алталаах-сэттэлээх уолчаан ити этиини долоҕойугар хатаан кэбиспит.

– Билгэлээбитин иһин артыыс буолбуппун дуу, чахчы өтө көрбүтэ дуу, билигин чопчу этэр кыаҕым суох, – диэн билинэр кини.

Муусука уонна оҕо аймах эйгэтигэр

Оскуола кэнниттэн юридическайга үөрэнэ сылдьыбыт, ол эрээри киниэнэ буолбатаҕын түргэнник өйдөөбүт. Онон, кыратыттан муусука доҕордоох уол, уһуну-киэҥи толкуйдаабакка, Дьокуускайдааҕы педколледжка туттарсан киирбит.

Оҕо эрдэҕиттэн гитара аргыстаах, муусука учуутала идэлээх Василий Васильевич тарбаҕа талбыт үстүрүмүөнүгэр оонньуон сөп: аккордеоҥҥа, фортепианоҕа, барабаҥҥа, о.д.а.

14 сааһыттан 26 сааһыгар диэри сайыннары-кыһыннары лааҕырдарга, ону сэргэ «Сосновый бор» оҕо сынньанар-чэбдигирэр киинигэр үлэлээбит.

– Оскуола саҕаттан сайын аайы оҕолору кытта алтыспыт буолан, улаханнык ыарырҕаппат этим. Санаабар, олоҕум тухары бу эйгэҕэ баар курдугум. Хаһан эрэ миэхэ оҕо буола сылдьыбыт үөрэнээччилэрим билигин бэйэбинээҕэр элбэх оҕолоохтор (иккиэн күлэбит).

Олоҕун аргыһа Надежда Ивановналыын колледжка үөрэнэ сылдьан билсибиттэр. Өйдүүр-өйүүр киһитэ – кини. Сүрүн оператора, Аделфос үгүс скетчтэрэ кини кыраҕы хараҕынан уһуллар.

Василина диэн кыыс оҕолоохтор, соторутааҕыта түөрт сааһын туолбут.

– Атын оҕолору үөрэтии уонна бэйэҥ оҕоҕун иитии диэн чыҥха атын эбит, – диир дьиэ кэргэн аҕа баһылыга.  

Быйылгыттан Аделфос дьоро тэрээһиннэргэ тамадалыыр. Бастаан төрөөбүт күннэртэн, выпускнойдартан саҕалаабыт, билигин хайыы үйэ үбүлүөйдэри, уруу киэһэлэрин иилээн-саҕалаан ыытар. «Дьон дьоллоох түгэнигэр кыттыһар, ол күнү бииргэ атаарар астык», – диир. Маны таһынан, «МОSТ» сыһыарыыга «Өйдөөх/Көрдөөх» шоуну ыытар, угуйугун да умнубат.

Баҕа санаатын мүччү тута сыспыт

Василий быйыл саас саха көрөөччүтүн киэҥ сэҥээриитин ылбыт «Золото Тойон Бая: Дневник геолога» киинэҕэ сүрүн оруолу толорбута. Кастина суох быһа ыҥырбыттар.

Биир үтүө күн Дмитрий Васильевич Шадрин эрийэн: «Эйигин бу оруолга көрөбүт, хайдаххыный, бааргын дуо?» – диэн ыйыппыт. Онуоха салла санаан, аккаастанан кэбиспит. Кэргэнигэр кэпсээбитигэр: «Хайдах буолаҕын? Олоҕуҥ тухары баҕарбытыҥ дии, сөбүлэс. Төттөрү эрий», – диэбит.

Ол курдук, Аделфос киинэҕэ уһуллан, оҕо сааһыттан илдьэ кэлбит ыра санаатын толорбута.

– Экран нөҥүө эрэ көрөр ааттаах-суоллаах артыыстардыын бииргэ үлэлиир ураты долгутуулаах уонна хас да бүк эппиэтинэстээх эбит, – диир сэһэргэһээччим.

Соторутааҕыта «Саха» НКИХ саҥа сериалыгар уһуллан бүттэ. Бу сырыыга кастины ааһан, оруолун бигэргэттэрбит. Күөх экраҥҥа күһүн тахсыахтаах диэн кэпсээтэ.  

Сахалыы стендап инникилээх дуо?

– Сыыспат буоллахпына, быйыл номнуо бэһис сылбытын стендаптыыбыт. Кырдьыгынан эттэххэ, бастаан кыратык куттана санаабыппыт, кэнсиэр көрө үөрэммит дьон соҕотох киһи сыанаҕа тахсан сүүрбэччэ мүнүүтэ саҥара турарын хайдах ылыныахтарай диэн.

Бастакы гастролбутун Амматтан саҕалаабыппыт. Үөрэ-көтө көрсүбүттэрэ. Дойдубар эрэ маннык буолуо дии санаабытым. Хата, хас тиийбит сирбитигэр оннук этэ.

Кырдьык, бастакы сылларбытыгар стендап диэни саҥа истэр көрөөччү бастаан туохха баран эрэрин соччо өйдөөбөт да буолуон сөп этэ. Билигин билэллэр, сөбүлээн сылдьаллар.

Биир омукпут эрээри, дьээбэни-хообону сир аайы атын-атыннык ылынарбытын бэлиэтии көрөбүн. Туохтан күлэрбит кытта туспа ээ. Итиннэ Сахабыт сирэ улахана, киэҥэ, баай култууралаах, дириҥ силистээх-мутуктаах норуот буоларбыт көстөр диэхпин баҕарабын.        

Тыл сүтэн эрэрин кинини харыстыырга улахан үлэ барара бэлиэтиир дииллэр. Туох да диэбит иһин, кэнники кэмҥэ куоракка сахалыы саҥарар оҕо, ыччат биллэ элбээбит диэн көрөбүн. Сахалыы ыытыллар тэрээһин үгүс, урут регламент быһыытынан нууччалыы буолуохтааҕын курдуга.

Саха омуга тыыннааҕын, тыллааҕын тухары сахалыы киинэлэр, ырыалар, скетчтэр сайда туруохтара диэн эрэнэбин.

Киһини ытатар дөбөҥ, оттон күллэрэр ыарахан, аны сахалары тоҥуйдар дииллэр. Аделфос туох диирий?

– Куоракка нууччалыы стендаптарга эмиэ кыттабын. Кырдьык, нууччалыы дьээбэлэнэргэ судургу соҕус, сахалыы арыый уустук. Ол эрээри тоҥуйдар диир сыыһа дии саныыбын. Күлэ-үөрэ кэлбит киһи бэлэм буолар. Алҕас кэлбит эрэ дьон: «Бу аата тугуй?» – диэхтэрин сөп.

Саҥарартан, дьону кытта кэпсэтэртэн сылайбаппын, хата, төттөрүтүн, күүс-сэниэ ылынар курдукпун. «Энергетическэй вампирбын» быһыылаах (күлэбит). Атын дьону кэтээн көрөрбүн, үөрэтэрбин эмиэ сөбүлүүбүн.

Туох да хоббим суох, айар үлэм – сөбүлүүр дьарыгым. Рилс устарбын үлэ дии санаабаппын,  сынньалаҥ курдук.

«Найди работу, которая тебе нравится, и тебе не придется работать ни одного дня в своей жизни» диэн этии миэхэ сыһыаннаах.