Адаптивнай үөрэхтээһин комплексыгар киирэр суолга хапытаалынай өрөмүөн ыытыллыаҕа

Манна айан суолун аспааллыахтара, тротуар тэлгиэхтэрэ, 6 уот тирээбилин туруоруохтара. Бэдэрээтчит – «Сахатрасстрой» ХЭТ, сакаасчыт – Дьокуускай куорат «Главстрой» муниципальнай хааһына тэрилтэтэ. Хапытаалынай өрөмүөн «Олох инфраструктурата» национальнай бырайыагы олоххо киллэрии иитинэн ыытыллыаҕа. Тутар-таҥар үлэ 2026 сыл алтынньы 31 күнүгэр түмүктэниэхтээх. Бу туһунан Олохтоох дьаһалта пресс-сулууспата иһитиннэрэр.

Санатар буоллахха, доруобуйаларыгар хааччахтаах оҕолорго аналлаах Адаптивнай үөрэхтээһин киинин бастакы түһүмэҕэ – 550 миэстэлээх аныгылыы тупсаҕай тутуулаах оскуола былырыын күһүн үлэҕэ киирбитэ. Үөрүүлээх аһыллыытын туһунан «Киин куорат» хаһыакка суруйан турабыт: https://kiinkuorat.ru/articles/elbeh-ki-i-ba-a-sanaata-tuolla

Бэлиэтээн эттэххэ, быйыл баараҕай бырайыак иккис түһүмэҕэ – 200 миэстэлээх оҕо уһуйаанын уонна 150 миэстэлээх интэринээти тутуу салҕанар.