Абитуриент – 2025: тутуу болдьоҕо, бүддьүөт миэстэтэ уонна саҥа быраабылалар

Бэрт сотору кэминэн, бэс ыйын 20 күнүттэн, Саха сиригэр үрдүк уонна орто анал үөрэххэ туттарсыы саҕаланыа. Итиэннэ атырдьах ыйын 15 күнүгэр диэри салҕаныа. 
Быйыл Саха сирин үрдүнэн 11-с кылааһы 8505 (былырыын 7594) оҕо бүтэрэр, оттон 9-с кылааһы – 14 865 (14 311) үөрэнээччи. Былырыыҥҥыга тэҥнээтэххэ, үөрэнээччи ахсаана биллэ эбиллибит.

Бүддьүөккэ көрүллүбүт үөрэх миэстэтэ

Саха Өрөспүүбүлүкэтин Үөрэххэ уонна билимҥэ министиэристибэтигэр иһитиннэрбиттэринэн, бу сылга үрдүк үөрэх кыһаларыгар – 5 438, профессиональнай үөрэх кыһаларыгар – 6 822 бүддьүөт миэстэтэ көрүллүбүт. Оттон тус сыаллаах миэстэлэргэ ылыы, ааспыт сылга курдук, “Работа в России” платформа нөҥүө ыытыллыа.

Ханнык докумуоннар ирдэнэллэрэ

- Сайабылыанньа – бүддьүөт уонна төлөбүрдээх үөрэххэ тус-туһунан көрүҥ нууччалыы тылынан суруйуллар.

- Бэйэ кимин туоһулуур докумуон – РФ гражданинын пааспара, загранпааспар да буолуон сөп, ол туһунан быраабылаҕа быһаччы бобуу суох.

- Үөрэх докумуона – аттестат эбэтэр диплом.

- СНИЛС.

- Тус дааннайы тутталларыгар сөбүлэҥ.

- Абитуриент доруобуйатыгар хааччахтаах буоллаҕына, инбэлиит буоларын туоһулуур медицинскэй ыспыраапка.

- Үөрэххэ киирэргэ ураты көрүллэр бырааптаах буоллаҕына, ону туоһулуур докумуон (холобур, анал байыаннай дьайыы кыттыылааҕа).

- Тус ситиһиилэри туоһулуур дипломнар, грамоталар, туоһу суруктар.

- Үөрэххэ туттарсааччы хаартыската (ахсаана, кээмэйэ үөрэх тэрилтэтин приемнай хамыыһыйатыттан чопчуланар).

Үрдүк үөрэх кыһалара докумуон дьиҥнээҕин (оригиналын) эрэ буолбакка, куоппуйатын эмиэ тутар эбээһинэстээхтэр. Манна докумуон куоппуйатын нотариуска бигэргэттэрэр ирдэммэт.

Докумуону туттарыы көрүҥнэрэ

Хас биирдии үөрэххэ туттарсааччы докумуонун хайдах көрүҥүнэн туттарарын бэйэтэ талар:

- “Госуслуги” порталынан (онлайн көрүҥ);

- Үөрэх кыһатын тутар хамыыһыйатыгар тиийэн;

- Почтанан;

- Үөрэх тэрилтэтин официальнай сайтын нөҥүө.

Колледжтарга уонна техникумнарга үөрэххэ туттарсарга суруйар сайабылыанньа ахсаана хааччахтаммат. Оттон үрдүк үөрэх кыһаларыгар докумуону 5-тэн элбэх сиргэ бэриллибэт.

2025 сылга киирбит уларыйыылар

- Үөрэххэ киирбитиҥ биллибитин кэннэ үөрэх тэрилтэтигэр ылалларыгар аттестат оригиналын оннугар киирэргэ сөбүлэҥи эрэ толоруохха сөп. Ол эрээри маннык сөбүлэҥи биэрии биир эрэ ВУЗ-ка көҥүллэнэр. Сөбүлэҥи “Госуслуги” порталынан электроннай көрүҥүнэн биэрии абитуриент порталга сөптөөх ирдэнэр бэлиэни туруоруммут буоллаҕына ылыныллар.

- Тус сыаллаах квотанан үөрэххэ туттарсааччылар тус ситиһиилэринэн 15-кэ диэри баалы ылыахтарын сөп (бу иннинэ 10 баал этэ). Эбии көрүллүбүт 5 баалы сакаасчыт тэрилтэ ыыппыт профориентационнай тэрээһинигэр кыттыы иһин ылыахха сөп.

- Үрдүк үөрэх тэрилтэлэрэ төлөбүрдээх үөрэх миэстэтин үөрэххэ тутуу хампаанньатын кэмигэр үрдүттэн ылла да эбэллэрэ бобулунна. Төлөбүрдээх үөрэххэ ыларга ылыммыт былааннарын “зачисление” буолуо 5 ый иннинэ, муҥутуур ахсааны ыйан, иһитиннэрэллэрэ ирдэнэр буолла.

- Хас биирдии абитуриент биир кэмҥэ биэс үрдүк үөрэх кыһатыгар, ол иһигэр хас биирдиитигэр 5-тии хайысхаҕа (идэҕэ), докумуонун туттарар бырааптаах.

- Туһунан квотанан үөрэххэ киирэр бырааптаах абитуриеннар (бастатан туран, СВО кыттыылаахтара, кинилэр оҕолоро),  үөрэххэ киирэргэ кинилэргэ анаммыт туһунан тургутугунан туттарсалларын таһынан, уопсай куонкуруска эмиэ кыттыахтарын сөп. Доруобуйаларыгар хааччахтаах абитуриеннар, тас дойду гражданнара эмиэ оннук быраабы туһаныахтарын сөп.

Маны сэргэ абитуриеннары өйүүргэ СӨ идэҕэ бэлэмнээһин урутаан иһэр киинин базатыгар “Абитуриент штаба” биир кэлим колл-киин үлэлиэ. Оттон Телеграмҥа долгутар ыйытыыларга тута хоруйдуур “Абитуриент-2025” чат-бот үлэлиэ.