АБИТУРА – 2026. Балаһыанньа хайдаҕый?

2026-2027 үөрэх дьылыгар орто уонна үрдүк үөрэх кыһаларыгар Саха сиригэр 5277 бүддьүөт миэстэтэ тыырыллан турар. Биллэн турар, саамай элбэх босхо үөрэх миэстэтэ М.К. Аммосов аатынан Хотугулуу-Илиҥҥи федеральнай университекка баар – 4036. Арктикатааҕы агротехнологическай университет (уруккута ЯГСХА) 715 устудьуону босхо үөрэххэ ылыаҕа, Арктикатааҕы култуура уонна искусство университетыгар (уруккута АГИКИ) – 122, Чурапчытааҕы физкультура уонна спорт институтугар – 163, Дьокуускайдааҕы уу тырааныспарын институтугар – 207, Музыка Үрдүкү оскуолатыгар 34 бүддьүөттэн үбүлэнэр миэстэ баар. Босхо үөрэх миэстэтин баһыйар өттө бакалавриат уонна специалитет хайысхатыгар көрүллэр, ону тэҥэ магистратураҕа, аспирантураҕа уонна ординатураҕа бааллар.

Билиҥҥи туругунан, үрдүк үөрэх кыһаларыгар 20 тыһыынчаттан тахса сайабылыанньа киирбит. Статистика көрдөрөрүнэн, абитуриеннар үксүн медицина хайысхатын талаллар, үгэс курдук, биирдиилээн гуманитарнай хайысхаларга уонна инженернэй-техническэй идэлэргэ талаһар абитуриент элбэх.

Үрдүк үөрэх кыһаларын кытта колледжтарга уонна техникумнарга туттарсыы үгэнэ. Быйыл өрөспүүбүлүкэ үрдүнэн орто үөрэххэ 54 кыһа докумуоннары тутар, ол иһигэр 50 орто анал үөрэх уонна 4 үрдүк үөрэх кыһалара бааллар. Барыта холбоон 6864 бүддьүөттэн үбүлэнэр миэстэ тыырыллыбыт.

Колледжтарга 19 саҥа идэ хайысхата киирбит. Холобур, Арктикатааҕы хотугу норуоттар колледжтарыгар сүөһүнү иитэр специалистары бэлэмниэхтэрэ. Оттон Нерюнгри медицинскэй колледжыгар стоматология салаата аһыллыбыт, Дьокуускайдааҕы сибээс техникумугар компьютернай оонньуулары оҥорор уонна оҥоһуу өйү кытта үлэлиир хайысха баар буолбут. Тутуу уонна геология хайысхатыгар информационнай моделирование, ууга сэрэхтээх буолуу, маһы таҥастааһын курдук ураты хайысхалар киирбиттэр.

Орто үөрэх кыһаларыгар абитуреннартан 13 тыһыынчаттан тахса сайабылыанньа киирбит. Саамай үрдүк куонкурустаах “сестринское дело” идэҕэ 600 сайабылыанньаны туттарбыттар. Ону тэҥэ начаалынай кылаас учууталыгар, экономика, оҥоһуу өй уонна автомеханика идэлэригэр элбэх киһи туттарсар эбит.

Колледжтарга саамай үрдүк куонкурустааҕынан инники күөҥҥэ Дьокуускайдааҕы медицина колледжа сылдьар – 2578. Медколледж кэнниттэн Педагогическай колледж, Сибээс уонна информационнай технология колледжа, Тыа хаһаайыстыбатын техникума уонна Технологическай сервис техникума сылдьаллар.

Колледжтарга туттарсар абитуриеннар 4 ньыманан докумуоннарын туттарыахтарын сөп:

• Госуслуги портал нөҥүө.
• Тус бэйэлэрэ тиийэн.
• Почтанан.
• Официальнай сайт нөҥүө.

Ханнык идэҕэ хас миэстэ баара барыта электроннай систиэмэҕэ киирэн турар.

Ыйытыылаах буоллаххытына, 122 нүөмэргэ эрийэн (эбии баттыыр сыыппараҕыт – 9) билсиэххитин сөп.

«МАХ» мессенджергэ чат-бот үлэлиир.

Маны таһынан, атырдьах ыйын 6 күнүгэр – абитуриеннартан докумуоннары тутуу биир кэлим күнэ биллэриллэр – колледжтар бары күүстээх үлэ эрэһииминэн докумуоннары тутуохтара.

Санатар буоллахха, 2026 сылга өрөспүүбүлүкэ оскуолаларын 15 066 оҕо тохсус кылааһынан бүтэрдэ,  8 171 оҕо – 11 кылааһынан.