АБДь кыттыылаахтарыгар уонна кинилэр дьиэ кэргэттэригэр нэдиэлэ иһигэр 230 консультацияны ыыттылар

Көмөнү өрөспүүбүлүкэ иһигэр уонна Ростов-на-Дону куоракка госпиталь хайысхатынан 200-чэкэ киһи ылла. Бу туһунан ыам ыйын 22 күнүгэр буолбут брифиҥҥэ СӨ психологическай киинин дириэктэрэ Владимир Скрябин иһитиннэрдэ.

Кини этэринэн, бастакы уонна хаттаан консультациялар, ону тэҥэ тус уонна бөлөҕүнэн дьарыктар ыытыллыбыттар. Бэс ыйын 1-5 күннэригэр өрөспүүбүлүкэтээҕи киин М.В. Ломоносов аатынан МГУ психологическай факультетын кытта «Бииргэ кэҥиибит» федеральнай бырайыак чэрчитинэн тэрээһиннэр сиэрийэлэрин ыытыаҕа.

Бырайыакка АБДь кыттыылаахтарын уонна кинилэр дьиэкэргэттэрин кытта үлэлиир исписэлиистэргэ, ону тэҥэ анал байыаннай дьайыыга өлбүттэр огдооболоругар уонна 5-10 саастаах оҕолоругар анаан араас тэрээһиннэр бааллар. Дьарыктар профессиональнай психологтар бэсиэдэлэринэн, босхо конфиденциальнай сессияларынан уонна биэс күн устата арыаллааһынынан ыытыллыахтара.