Ааспыт сылга Дьокуускайга 154 киһи сэллигинэн ыалдьыбыт

Дьокуускай куораттааҕы Сэллиги утары диспансер сэбиэдиссэйэ Анна Лукина иһитиннэрбитинэн, киин куоракка ааспыт 2025 сылга сэллигинэн ыалдьыы 154 түбэлтэтэ бэлиэтэммит. Бу көрдөрүү өрөспүүбүлүкэҕэ бэлиэтэммит түбэлтэ аҥаарын ылар. Исписэлиистэр төһө да ыарыы уопсай ахсаана кэлиҥҥи сылларга намырыырын үрдүнэн, Дьокуускай куоракка балаһыанньа сытыытык турарын, маныаха ордук болҕомтону оҕо аймахха уурар наадатын ыйаллар.

Ол курдук, оҕо сэллик ыарыыга хаптарыыта Дьокуускай куоракка өрөспүүбүлүкэ көрдөрүүтүн 2 төгүл баһыйбыт. Онон профилактическай кэтээн көрүүлэри тиһиктээхтик ыытар суолтата бэлиэтэннэ.

Эмчиттэр сэллик ыарыытын сэрэтэри атахтыыр сүрүн кыһалҕаларынан улахан дьону бэрэбиэркэлээһин ситэтэ суоҕун, каадыр боппуруоһа сытыытык турарын, 2026 сылга үбүлээһин кэмчититтэн иммунодиагностическай эмп тиийбэтин ааттаатылар.

Мантан сиэттэрэн «Молодежь. Семья. Спорт — Здоровый город» муниципальнай бырагырааманы үбүлээһини күүһүрдэр наадата ыйылынна. Ону сэргэ биэдэмистибэлэр икки ардыларынааҕы хамыыһыйа үлэтин сөргүтэргэ, бу үлэҕэ уокуруктар салалталарын сыһыарарга, бары тэрилтэлэргэ профилактическай көрүүнү булгуччулаах оҥорорго этии киллэрдилэр.

Дьокутааттар сэллик ыарыыны сэрэтэр тэрээһиннэри күүһүрдэр наадатын ылыннылар.