Аармыйаҕа ыҥырыллыбыт дьон кэргэттэрэ босуобуйа ылар кыахтаахтар

Саха сиригэр 2026 сылга 11 оҕо күүтэр дьахтар биир кэмнээх босуобуйаны ылбыт. Ону таһынан сыл саҕаланыаҕыттан 36 дьахтар оҕотугар ыйдааҕы босуобуйаны ылбыт. Бу туһунан Арассыыйа социальнай пуондатын оҕолоох ыаллары социальнай хааччыйыыга департаменын салайааччытын солбуйааччы Алексей Шамаев муус устар 20 күнүгэр брифиҥҥэ эттэ.

“Хат буолуу болдьоҕо кырата 180 күннээх буоллаҕына, көмө ылыаххытын сөп. Сайабылыанньаны кэргэҥҥит байыаннай сулууспата бүтэрэ алта ыйтан хойутаабакка биэриэхтээххит — судаарыстыбаннай өҥө порталынан, СФР эбэтэр МФЦ нөҥүө. Сүрүн көмө суумата, 2026 сылга эрэгийиэннээҕи кээписийиэни аахпакка туран — 45 054,24 харчы. Докумуону оҥотторорго байыаннай чаастан эбэтэр военкоматтан кэргэниҥ байыаннай сулууспатын туоһулуур, сулууспалаабыт күннэрин ыйар сайабылыанньа наада буолуоҕа”, — диэн быһаарда Алексей Шамаев.

Босуобуйаны байыаннай кафедраҕа эбэтэр байыаннай училищеҕа бастакы кууруска үөрэнэр устудьуоннар кэргэттэрэ эмиэ ылыахтарын сөп. Сайабылыанньалары 10 үлэ күнүн иһигэр көрөллөр, уонна, бигэргэтиллибитин кэннэ, харчы 5 үлэ күнүн иһигэр киирэр. Оҕо ыйдааҕы босуобуйатын оҕону дьиҥнээхтик көрөр-истэр ийэтэ, эпэкиин эбэтэр аймахтара (холобур, эһэтэ, эбэтэ) ылыахтарын сөп. Төлөбүр, аҕата бастакы кууруска байыаннай тэрилтэҕэ үөрэнэр буоллаҕына, эмиэ төлөнөр.

Босуобуйа сыл аайы индексацияланар. 2026 сылга эрэгийиэннээҕи кээписийиэни аахпатахха, 19 308,96 солк. Босуобуйа оҕо төрүөҕүттэн үс сааһын туолуор диэри төлөнөр. Докумуоннары судаарыстыба өҥөтүн порталын (www.gosuslugi.ru/610789/1/form) нөҥүө эбэтэр СФР килийиэннэри өйүүр киинигэр эбэтэр МФЦ-ҕа биэриэххэ сөп.