Ааҕыы күүрүүнү намтатар, олоҕу уһатар

Сассекс университетын учуонайдара быһаарбыттарынан, күҥҥэ алта мүнүүтэни ааҕыыга анаатаххына, сүрэҕиҥ тэбиитэ бытаарар, күүрбүтүҥ, ыгылыйбытыҥ ааһар.

Ааҕыы – мэйии үлэтин күүһүрдэр, тупсарар биир судургу ньыма.  

Кинигэ истириэс 68%-нын кыйдыыр, ол аата музыкатааҕар, чэйдээҕэр уонна хаамыытааҕар ордук көдьүүстээх. Аралдьыйаҕын, холкугар түһэҕин, бу кэмҥэ мэйииҥ сынньанар.

Итэҕэйиҥ-итэҕэйимэҥ, бу туһалаах дьарык олохпутун уһатар эбит. Өскөтүн нэдиэлэҕэ 3,5 чаастан ордук ааҕар буоллаххына, уһун үйэлэнэр кыаҕыҥ 23% үрдүүрүн Йельскэй университет исписэлиистэрэ быһаарбыттар. Кинигэни кытта доҕордоспот киһи, төһө даҕаны чөл олоҕу тутуспутун иһин, түргэнник кырдьар, ыарыыга ылларымтыа буолар үһү.  

АХШ учуонайдара биир интэриэһинэй кэтээн көрүүнү ыыппыттар. Онно 70-тан үөһэ саастаах дьон кыттыбыттар.  Ол түмүгүнэн мэлдьи ааҕар киһи өйө дьэҥкэ, толкуйа тобуллаҕас буолара бэлиэтэммит. Мэйии үлэтэ дьарыга суох мөлтүүр!

Уус-уран айымньы өссө көдьүүстээҕэ дакаастаммыт: мэйии кинигэҕэ ойууланар уобарастары, сыты-сымары, бэл диэтэр, тыаһы-ууһу дьиҥнээх курдук ылынар эбит. Оттон социальнай ситим сонуннарын онон-манан арыйталаан көрүү, үрдүнэн-аннынан сүүрдэн ааҕыы улахан туһата суох. Кырдьыга даҕаны, кэпсээн, сэһэн, арамаан ойуулаан көрөр дьоҕуру сайыннарар сүдү күүстээх эбээт.

Онуоха саамай сүрүнэ – айымньы иһигэр киирии,  сюжетын кэтээн көрүү. Бу болҕомтолоох буолууну, тулууру, дьаныары уонна иҥэн-тоҥон өйдүүр сатабылы эрэйэр.  

Кинигэни ааҕыы үгүс үбү-харчыны ирдээбэт, чуумпуга эрэ наадыйар.

Өй үлэтин эрчийэр бастыҥ дьарык долбуурга турар!