Милена Борисова: Аҕыйах сөкүүндэ иһигэр аатырыахха сөп дуо?

Дьиҥэр, мелодист, ырыаһыт, уһуйааччы Милена Борисова - айар эйгэҕэ биллэр, этэргэ дылы, номнуо аатын ааттаппыт киһи.

Ол эрээри быйылгы Саҥа дьыл бырааһынньыга киниэхэ ол таһымын өссө бигэргэтэр уонна өссө үрдүккэ таһаарар кыаҕы биэрдэ. Аҕыйах мүнүүтэ, сөкүүндэ дуу иһигэр уостан түспэт ырыаны оҥоро охсор таһымҥа тахсыбыт дьон биһиги кэккэбитигэр, арааһа, суоҕа буолуо. Ол курдук, Милена Борисова «Хаарчаана» ырыата бүгүҥҥү күҥҥэ 333 тыһыынчата көрүллүбүт.

«Хаарчаана” ырыа хайдах үөскээбитин Милена бу курдук кэпсиир:

– Ол күн оруобуна Кытайтан табаарым кэлбитэ (Милена иллэҥ кэмигэр Кытайтан табаар сакаастыыр - Аапт.). ДСКттан ону ылан, тиэнэн бараммын, пробка быыһынан куорат киинигэр айаннаан истэхпинэ, төлөпүөммэр бу ырыа сотору-сотору тыаһаа да тыаһаа буолар. Киһи барыта төлөпүөнүгэр туруоруммут. Наһаа элбэхтик истэн, олох мэйиибэр хатанан хаалла. Ол иһин төлөпүөммүн арааран кэбистим уонна эмискэччи сахалыы ыллаан киирэн бардым: «Кэпсээриий, ханна сылдьыбыккыный...».  Ол курдук «Прометей” микрооройуон аттынан ааһан иһэн манна Бүөккэ Бөтүрүөп устуудьуйата баарын өйдүү түстүм да, киниэхэ эрийдим:

– Записьтыыгын дуооо?

– Записьтыаххаа, – диэтэ.

Тиийдим уонна биир тыынынан ыллаан кэбистим. Ол кэнниттэн хаһан айгыстан дьиэбэр тиийиэхпэр диэри уол номнуо ырыабын оҥорон ыытта. Сразу Викаҕа суруйбутум. Уобараспытын толкуйдаатыбыт. Нөҥүө күнүгэр Вася Барановтыын клиппитин устан кэбистибит.

Бу курдук, соһуччу, олус кылгас кэмҥэ, аҕыйах мүнүүтэ, сөкүүндэ даҕаны иһигэр сахалыы трендовай ырыа үөскээбитэ.

Cанатар буоллахха, бу ырыаны сотору аны Какитока диэн ырыаһыт ыллаан, эмиэ бобуулаах социальнай ситимҥэ сурутааччытын ахсаанын лаппа элбэппитэ.

«Расскажи, Снегурочка» треги бастаан оҥоһуу өй көмөтүнэн Геленджиктэн дизайнер Саша Комович оҥорбута. Бары билэрбит курдук, композиция “Ну, погоди!” сэбиэскэй мультипликационнай киинэҕэ анаан поэт Юрий Энтин тылларыгар, композитор Геннадий Гладков музыкатыгар суруллубут «Песенка Деда Мороза и Снегурочки» ырыаҕа олоҕурар. Саҥардыллыбыт, аныгылыы тыыннаммыт ролигы аҕыйах күн иһигэр 15 мөлүйүөнтэн тахса киһи көрбүтэ.

Ыспыраапка: «Ну, погоди!” мультик 8-с сериятыгар поэт Юрий Энтин икки нэдиэлэ иһигэр 1,38 мүнүүтэ уһуннаах ырыа хоһоонун айар сорудаҕы ылар, ону толорор. Музыкатын Геннадий Гладков суруйан, бүгүҥҥү күҥҥэ диэри Саҥа дьыл бырааһынньыгын аайы тыаһыыр «Песенка Деда Мороза и Снегурочки» ырыа айыллар. Эмиэ атын мультипликационнай киинэҕэ Валентина Толкунова толоруутугар «Кабы не было зимы», эбэтэр Людмила Гурченко толоруутугар «Пять минут” норуот сөбүлээн ыллыыр ырыаларын кэккэлэригэр мантан ыла Милена Борисова  “Хаарчааната» киирбитинэн ааҕыахха сөп.

Эһиги туох дии саныыгыт?

Ырыаны манны көрүҥ: https://vk.ru/wall-211246818_562