Аһынан хааччыйар эйгэҕэ бэйэ дьарыктаах аҕас-балыс

Дьокуускай куоракка Сунтаартан төрүттээх аҕас-балыс «Три сестры» диэн аатынан ас арааһын атыылыыр кафены, ону таһынан дьиэ аһыттан тоҥоруллубут гедза, манты, тефтель уо.д.а. курдук билиҥҥи дьон сөбүлээн сиир аһын оҥорор сыаҕы тэринэн үлэлэппиттэрэ балачча буолла. Кыргыттар астара минньигэһин, тотоойутун сирдиир-ситимниир тыл киһиттэн киһиэхэ тарҕанан, бастайааннай килийиэннэрэ күн-түүн эбиллэ турара туоһулуур. Асчыт кэрэ куолар кимнээхтэрин билсэн, туоһулаһан бу дьиэ кэргэн дьыалатын иилиир-саҕалыыр Дженни Жирковалыын кэпсэттибит. Алена, Дженни уонна Люция Элгээйи нэһилиэгин элбэх оҕолоох дьиэ кэргэниттэн төрүттээхтэр эбит. Үс улахан кыыс манна, Дьокуускайга, олохсуйан, аһынан хааччыйар эйгэҕэ бигэтик киирэн үлэлии-хамсыы сылдьаллар.

– Дженни, бастатан туран, ааҕааччыларга бэйэҕин билиһиннэрэ түс эрэ.

– Мин бэйэм идэбинэн «Технолог общественного питания» диэн үөрэхтээхпин, ону тэҥэ 4-с разрядтаах повар буолабын.

– Кафе арыйар туһунан санаа хайдах, кимиэхэ бастаан көтөн түспүтэй? Аан бастаан хаһан арыллыбыккытый?

– Бастаан 2016 с. балтым Люция «бэйэбит дьыала тэринэн үлэлиэххэ» диэн санаа, идиэйэ курдук киллэрбитэ. Онтон мин толкуйдуу охсон сөбүлэһээппин кытта үлэни саҕалыырга табыгастаах миэстэни көрдөөн барбыта. Онтон ылсыбыт санаабытын кыралаан олоххо киллэрэн барбыппыт.

– Бастаан саҕалыыргытыгар туох ыарахаттары көрсүбүккүтүй? Туох эмэ урбаанньыттарга көрүллэр чэпчэтиилэри туһанаҕыт дуо?

– Бастаан саҕалыырбытыгар 35 тыһ. эрэ солкуобайдаах этибит. Тэриллэртэн 2 остуол, 1 плитка, 1 холодильник баара. Онтон дьыалабыт атаҕар туран истэҕин аайы кыралаан араас оборудованиены ылан барбыппыт. Бэйэ дьыалалааҕы, дьоҕус урбаанньыты өйүүр туох даҕаны көмөнү туһамматахпыт.

– Ким туох эбэһээтэлистибэлээҕий?

– Бииргэ төрөөбүттэр буолан үлэлиир олус үчүгэй диэн бэлиэтиир тоҕоостоох. Бииргэ үлэлиир партнердаргын  ким хайдах-туох майгылааҕын, кыаҕын, туохха дьоҕурдааҕын  оҕо эрдэхтэн билэр буолан, үлэлииргэ чэпчэки. Мин технолог, повар үөрэхтээх буоламмын биир үксүн куукунабын сүрүннүүбүн. Оттон эдьиийим уонна балтым атыы-эргиэн, бородууксуйаны тарҕатыы, батарыы өттүгэр үлэлэһэллэр.

– Бастаан бэйэҕит саҕалаабыт буоллаххытына, билигин кэлэктиипкит улаатта дуо? Хамаандаҕытын билиһиннэр эрэ.

– Бэйэбитин таһынан хамаандабытыгар 11 үлэһиттээхпит: повардар, суоппардар уонна атыыһыттар.

– Хас биирдии дьон аһыыр сиригэр «фирменнэй», дьон хото сакаастыыр бүлүүдэтэ баар буолар. Эһиэхэ оннук бүлүүдэнэн тугу ааттыаҥ этэй?

– Кэтээн көрүүбүнэн, дьон саамай сөбүлээн аһыыр аһа диэн бурдук ас буолар уонна гедза арааһын эмиэ хото ылаллар.

– Сотору бырааһынньыктар буолаары тураллар. Маннык кэмнэргэ түбүккүт элбиирэ буолуо?

– Биллэн турар, бырааһынньык үксэ минньигэс ас аргыстаах буолар буолан, маннык кэмнэргэ түбүкпүт, үлэбит элбээччи.

– Өрөбүлэ суох үлэлиигит. Ыал ийэлэрэ дьон барытын хайдах баттаһаҕыт, үлэ күнүн аттаран үллэстэҕит дуу?

– Өрөбүл диэн биһиэхэ суох. Ол эрээри сорох кэмҥэ эбээһинэһи биир сүрүн үлэһиппитигэр туттаран, сынньанан ылааччыбыт.

– Ас астыыр тэрилтэни үлэлэтэр атын өҥөнү оҥорор тэрилтэлэрдээҕэр ордук элбэх уустуктардаах дииллэр.

– Биллэн турар, ас эйгэтин ылсар туһунан уустуктардаах, ирдэбилэ даҕаны кытаанах. Тугу барытын сокуоҥҥа эппиэттиир гына толорорго кыһаллабыт.  Үлэбитин хаачыстыбалаахтык оҥорору ирдиибит даҕаны.

– «Три сестры» сылдьыбыт дьон үксүн гедзаҕытын, бэрэскигитин олус хайҕаабыт буолааччылар. Балары, кистэл буолбатах буоллаҕына, ким сүрүннээн астыырый?

– Гедза арааһын эдьиийим Алена хонтуруолунан оҥороллор, оттон атын бурдук ас мин хаһаайыстыбам.

– Инникитин бу дьыалаҕытын кэҥэтэр, таһымы улаатыннарар былааннааххыт  дуо?

– Инники былааммыт улахан, хас биирдии бэйэтигэр үлэлиир киһи кэҥиир-улаатар сыаллаах буолар. Биһиги эмиэ улахан сыаҕы тэринэн, бэйэ маҕаһыынын уо.д.а. дьыалабыт улаатарыгар туһалааҕы арыйыахпытын баҕарабыт.

– Бэйэ дьыалатын саҕалыан баҕалаахтарга тугу сүбэлиэҥ этэй?

– Бэйэ дьыалатын арынар дьоҥҥо тугу ылсалларын үчүгэйдик барытын ымпыгар диэри толкуйдаан баран,  саҕалаатылар да иҥнибэккэ, тохтообокко иннилэрин диэки баран иһэллэригэр баҕарабын.

– Дженни Алексеевна, сэргэх кэпсэтиигэр махтал буоллун! Аҕас-балыс ылсыбыт үлэҕит дьон махтала аргыстаах, өрүү ситиһии сэтиилээх буоллун!

«Три сестры» кафе кэрэ хаһаайкалара судургутук оҥоһуллар бэрт минньигэс, тотоойу бельгийскэй баахыла эрэсиэптэрин ааҕааччылары кытта үллэстэллэр.

Бельгия баахылата

Порцията: 10 баахыла

Ингредиеннэрэ:

300 г бурдук;

10 г разрыхлитель;

75 г мэлии саахар;

100 г ынах арыыта;

2 сымыыт;

0,5 л үүт;

Бэйэ сөбүлүүрүнэн туус.

Туохха буһара: анал баахыла буһарарга эбэтэр грильгэ.

1. Миискэҕэ бурдукпутун уонна разрыхлители кутан булкуйабыт.

2. Бу бурдукпут ортотун дириҥэтэ хаһабыт уонна онно тууһу, саахары, уулларыллыбыт ынах арыытын уонна сымыыттарбытын кутабыт.

3. Тиэстэни булкуйа-булкуйа кыралаан үүппүтүн эбэбит.

4. Тиэстэбитин 1 чаас «сынньата» түһэбит.

Ол кэннэ баахыла форматыгар (эбэтэр оннук кэтэрдиллэр формалаах грильгэ) тиэстэбитин кутан 3-4 мүн. буһарабыт.

Минньигэстик аһааҥ!

Хаартыскалар: Дьоруой тиксэриитэ