А.Е.Кулаковскай-Өксөкүллээх Өлөксөй фонограба

Сардана Иннокентьевна Сыроватская, Бүлүү түмэлин үлэһитэ:

– Ыам ыйын 23 күнүгэр 1917 сыллаахха Бүлүү куоратыгар аан бастаан кыраайы үөрэтэр түмэл тэриллибитэ. Тэрийбит киһинэн Бүлүүтээҕи үрдүкү начаалынай училище учуутала уонна кыраайы үөрэтээччи Үлэ Дьоруойа Петр Хрисанфович Староватов буолар.

“Түмэл киэн туттар экспоната” бырайыакка Алексей Елисеевич Кулаковскай-Өксөкүлээх Өлөксөй Бүлүүгэ үлэлиир кэмин саҕанааҕы фонограбын билиһиннэрэбит. 1912 сыллаахха атыыһыт казак Прокопий Николаевич Попов дьиэтин куортамнаһан олорон, Эдисон фонограбын атыыласпытын туһунан куорат кырдьаҕас олохтоохторо кэпсииллэр.
Бу аппараат 1887 сыллаахха оҥоһуллубут. Киһи саҥатын устар эбит. Онон Алексей Елисеевич ырыалары, остуоруйалары, үһүйээннэри устара эбитэ үһү.
Биһиги түмэлбитигэр бу экспонаты 1984 сыллаахха Бүлүү куорат 350 сааһын туоларыгар куорат кырдьаҕас олохтооҕо Константин Гаврильевич Попов бэлэхтээбитэ. Константин Гаврильевич кэпсииринэн, Кулаковскай Бүлүүттэн Санкт-Петербурга барарыгар харчыга наадыйан кини аҕатыгар, ол кэмҥэ куорат старостатынан үлэлии олорбут Гаврил Иванович Поповка, атыылыыр.